Gazeta serbe “Blic” raporton se një shqiptar nga Kosova me emrin Vlasuf Haziri 58 vjeç, është arrestuar sot në Serbi, nga një aksion i shërbimit kundër krimit të organizuar, nën dyshimet për prodhim të paautorizuar të drogës.
Mediat serbe shkruajnë se shqiptarit iu kapën 5 kg heroinë në një makinë tip “Golf 5”, i cili ishte duke lëvizur në drejtim të Kosovës në momentin kur është arrestuar. Arrestimi i shqiptarit ka ndodhur në Bujanovc.
Sasia e drogës ishte vendosur në 15 pako. Në shkrimin e mediumit serb thuhet se shqiptari njihej si bos droge nga komuniteti në Tërnocin e Madh, fshat i banuar kryesisht nga shqiptarë.
I dyshuari u ndalua për 48 orë, e do të dalë më tej përpara Prokurorisë së Vranjës nën dyshimin e kryerjes së veprimeve kriminale.
