Pas nismës së ndërmarrë nga ministri i financave Arben Ahmetaj për heqjen e dëmshpërblimeve ndaj ish-të përndjekurve politikë ka reaguar edhe ish drejtuesi i departamentit të të përndjekurve në PD, Tomor Alizoti.
Ai ka kritikuar vendimin por jo më pak edhe Partinë demokratike ku thotë se PD nuk i ka mbështetur siç duhet, pasi në strukturat e kësaj partie ka ish-zyrtarë të PPSH-së.
Po ashtu Alizoti shkruan se për një pjesë të kësaj shtrese që nuk iu janë dhënë dëmshpërblimet nga qeveria, PD nuk ka reaguar.
Postimi i plotë:
Në mënyrë të shëmtuar duke dëshmuar urrejtjen dhe përçmimin e Partisë së Punës nga e cila vjen, qeveria shqiptare shpalli se do të dëmshërblejë vetëm ata që janë gjallë dhe jo trashëgimtarët e atyre që u vranë, burgosën, torturuan, masakruan nga komunizmi. Ky vendim poshtërues i qeverisë shqiptare po kalohet në heshtje edhe nga Partia Demokratike e cila është e mbushur me njerëz të cilët nuk kanë asnjë ndjeshmëri ndaj viktimave të komunizmit. Në partinë e sotme demokratike gjen liberalë të majtë, ish komunistë, familjarë ish komunistësh të zellshëm dhe të rëndësishëm, gazetarë të ish Zërit të Popullit apo mediave të tjera të komunizmit, familjarë të njerëzve që kanë punuar në Institutet e Nexhmije Hoxhës. Gjen njerëz që janë në PD sepse aty gjetën një mundësi për të qenë në politikë por mund të ishin me shumë dëshirë edhe në PS-në që mori këtë vendim. Kjo nuk është vetëm trishtuese por edhe shkatërruese për vetë Partine Demokratike!Nderkohe Lulzim Basha hesht…
