Në një takim në Bratisllavë, Sllovaki, Shqipërisë iu dorëzua sot për herë të parë në historinë e saj drejtimin e OSBE (Organizata për Siguri dhe Bashkëpunim në Europë). Shqipëria do të drejtojë zyrtarisht këtë organizatë nga 1 janari, deri në fund të 2020.
Në praninë e Kryeministrit Rama, vendit iu dorëzua stafeta prej Miroslav Lajçak, ish-komisioneri europian dhe Ministri i Jashtëm dhe Europian të Sllovakisë, vendit që ka presidencën aktuale.
Në fjalën e tij, Kryeministri Rama kujtoi se: “kur OSBE u themelua, pikërisht 45 vjet më parë, Shqipëria ishte vendi i vetëm që përmes zërit të diktatorit të saj komunist refuzoi të ishte pjesë e saj”.
“Shpresa e vetme e satelitëve të Bashkimit Sovjetik është të forcojnë lidhjet me SHBA dhe Perëndimin, në formën e kredive pa asnjë kufizim, për të lejuar kishën që të zërë vendin e dikurshëm, për të thelluar degjenerimin e mëtejshëm moral, etj”, deklaronte atëherë zyrtarisht Shqipëria.
Ndërsa sot, vendi, “një anëtar krenar i OSBE” sipas Ramës, merr drejtimin e kësaj organizate presitigjioze, një prej detyrave thelbësore të të cilës është monitorimi dhe garantimi i standarteve demokratike të zgjedhjeve anembanë botës.
Kalimi i presidencës së OSBE tek Shqipëria provon se në sytë e ndërkombëtarëve, për herë të parë vendi ynë gëzon pjekurinë dhe ekspertizën e nevojshme për të thënë fjalën e saj në çështjet e sigurisë dhe demokracisë në Europë.
Me krizën në Ukrainë, si dhe rritjen e autoritazmit dhe tendencave nacionaliste në të gjithë Europën, Shqipëria merr drejtimin e OSBE në një moment historik përcaktues për fatet e kësaj organizate.
“45 vjet më parë, unë isha ashtu si të gjithë të tjerët, me detyrim një pioner 11-vjeçar i Shqipërisë komuniste. Sot, jam Kryeministri 55-vjeçar, i Shqipërisë së re dhe moderne”, theksoi në fjalën e tij Rama.
