“Individët që jetojnë me qiranë e një mjedisi që e kanë në pronësi dhe nuk kanë të ardhura të tjera, do jemi ne që do i mbështesim për këtë periudhë”.
Kështu tha Kryeministri Edi Rama pasditen e sotme, duke premtuar subvencione, ashtu sikundër tha se do të mbështeten me subvencion edhe bizneset e vogla “që sigurisht nuk do e paguajnë qiranë deri në limitin e vendosur”.
Ai shtoi se kur të përballen me qiradhënësin nuk do të lihen vetëm.
“Sigurisht do subvencionojmë jo të gjithë masën e qirasë, por sipas kategorive që duhen përcaktuar mirë. Buka ndahet, shqiptari e ndan bukën dhe për bukë shqiptari nuk ka vdekur kurrë, asnjëherë dhe as ka për të vdekur, kjo është pak fare, por e sigurt”, deklaroi Edi Rama.
Propozimet e opozitës për mbështetjen financiare të qytetarëve kryeministri Edi Rama i quan me ironi “si receta magjike e Sudes”.
“Partia e Sudes e ka shumë kollaj, sjell një faturë që do kishte tronditur edhe Francën në raport me prodhimin e përgjithshëm kombëtar. Si recetat magjike të Sudes. Shqiptari e ndan bukën, e për bukë nuk ka vdekur“, tha Rama.
