Vizitorët të cilët dëshirojnë të shkojnë në Zvërnec për të kaluar një ditë të bukur në plazh, tashmë nuk do t’ju duhet të shqetësohen më për rrugën e amortizuar te fabrika e sodës, pasi kjo e fundit është rikonstruktuar dhe është gati të ofroj komoditet për drejtuesit e automjeteve.
E transformuar nga një aks i pakalueshëm, në një rrugë e cila po finalizohet me të gjitha standardet, ky segment pritet që t’i shërbej zhvillimit të turizmit, bën me dije prefekti i qarkut Vlorë, Flamur Mamaj për Agjencinë Telegrafike Shqiptare (ATSH).
“Rruga ka qenë e pakalueshme te petrolifera. Ne patëm një bashkëpunim me gjithë biznesin e zonës dhe petroliferën, ku bëmë të mundur nivelimin e rrugës, mbushjen me çakëll, deri ditën e sotme ku i kemi hedhur rërë bitumi mbi të. Kjo rrugë ka qenë një nga akset e pakalueshme e cila është kthyer në një rrugë të kalueshme, ku mund të udhëtohet normalisht dhe pa probleme. Kjo rrugë do ti shërbej më së miri turizmit, zonës së Zvërnecit si dhe petroliferës”, – theksoi Mamaj.
Përveç stimulimit të turizmit në këtë zonë, ndërtimi i kësaj rruge pritet që të ndikojë edhe në ekonominë lokale, pasi në Zvërnec ka një prezencë të shtuar të turistëve vendas si dhe të huaj.
“Për zonën e plazhit të Zvërnecit, petroliferën dhe për hotelet përreth do të ketë një impakt ekonomik, pasi janë shtuar turistët, si ata polak, hungarez dhe italian në plazhe.
Pjesa më e madhe e turistëve janë të zonës së Fierit, Vlorës, Beratit që shkojnë për të bërë plazh, por ka pasur edhe një fluks të lartë të turistëve të huaj, të cilët nuk e kanë frekuentuar këtë zonë për shkak të rrugës së amortizuar dhe të pakalueshme. Rruga po ndërtohet sipas të gjitha standardeve dhe brenda sezonit tjetër turistik do t’i ketë të gjitha standardet e duhura”, – theksoi prefekti.
Ndërtimi dhe kthimi brenda parametrave të kësaj rruge ka shtuar edhe fluksin e qarkullimit të automjeteve në këtë zonë, ku tani numërohen rreth 2000 mijë automjete në ditë që kalojnë në këtë segment rrugor.
“Para se të fillonte ndërtimi i rrugës, fluksi ka qenë shumë i pakët, pasi rruga ishte në gjendje shumë të keqe. Nga mesi i korrikut deri sot, fluksi në këtë rrugë është rritur ndjeshëm pasi plazhet e Zvërnecit janë plot. Në ditë vetëm në këtë rrugë mund të qarkullojnë mbi 2 mijë makina me destinacion plazhet. Fluksi ka qenë i jashtëzakonshëm, plazhet e Zvërnecit janë plot me pushues”, – përfundoi Prefekti i Vlorës, Flamur Mamaj.
