TIRANE, 5 Nëntor/ATSH/-Rruga që lidh Divjakën me qytetin e Lushnjës, por edhe fshatrat përreth është drejt përfundimit.
Segmenti rrugor pritet që të shkurtojë distancën mes dy qyteteve me të paktën 15 km.
Përveç trotuareve, sistemimit të rrjetit të kanalizimeve dhe ndriçimit, parashikohet edhe një korsi e dedikuar për biçikleta.
Në një prononcim për mediat, Kryetari i bashkisë Divjakë Fredi Kokoneshi tha se ka përfunduar segmenti i parë dhe segmenti tjetër i unazës bujqësore, që lidh njësinë administrative Grabjan dhe Gradisht.
Aktualisht sipas tij, punimet janë në fazën përfundimtare, për të lidhur rrugën me qendrën e qytetit.
Por, bashkia Divjakë është në përfundim edhe të disa projekteve me rëndësi për fermerët dhe banorët e zonës.
“Do të kemi një kolektor me tuba çeliku, ku do të bëjmë furnizimin e rezervuarit dhe pastaj do të bëjmë përcjelljen e këtyre kolektorëve përgjatë tokave. Pra në vitin që vjen, Divjaka do të ketë ujë për vaditjen e tokave në të gjithë territorin e saj. Jemi në përfundim të një nga shkollave më të mëdha në qytetin e Divjakës, shkollën 9-vjeçare ‘Koli Sako’”, ka përfunduar Kokoneshi.
Divjaka është kthyer në një destinacion turistik jo vetëm për shtetasit shqiptarë, por edhe ata të huaj. /z.t/ /a.g/
