Inter dhe Roma do të kërkojnë të kthehen te fitorja kur të përballen mbrëmjen e së dielës në “San Siro”, në një ndeshje të vlefshme për javën e 21-të të kampionatit italian. Zikaltrit e kanë nisur shumë mirë sezonin, por kanë pasur vështirësi në ndeshjet e fundit. Lojtarët e Luciano Spalletti-t, në fakt, nuk kanë marrë asnjë fitore në pesë ndeshjet e fundit të luajtura në kampionat (2 humbje, 3 barazime). Nëse llogarisim edhe dy ndeshjet e luajtura në Kupën e Italisë, ata nuk fitojnë prej shtatë ndeshjesh radhazi, duke parë se Icardi-t me shokë u janë dashur penalltitë për të eliminuar Pordenone-n dhe janë mundur nga Milan në çerekfinale.
Roma, nga ana tjetër ka marrë dy humbje dhe një barazim në tri ndeshjet e fundit të Serisë A dhe ka shkuar 12 pikë larg kreut, por ka një ndeshje për të rikuperuar. Rreziku numër një për verdhekuqtë do të jetë Mauro Icardi, i cili ka realizuar 18 nga 35 golat e zikaltërve në kampionat. për më tepër, pjesën më të madhe të këtyre golave ai i ka shënuar në shtëpi dhe ai ka arritur të gjejë rrugën e rrjetës në dy ndeshjet e fundit që ka luajtur kundër Roma-s. Gjithsesi, të dy këto skuadra nuk kanë probleme para portës dhe në katër ndeshjet e fundit mes tyre të dy ekipet kanë shënuar. Për këtë arsye pritet që super ndeshja e “San Siro”-s të dhurojë gola dhe spektakël.
Shifra dhe Fakte
– Inter nuk ka pësuar asnjë humbje në 20 nga 22 ndeshjet e fundit të luajtura në kampionatin italian.
– Në tre takimet e fundit që janë luajtur mes këtyre dy ekipeve janë realizuar mbi 2.5 gola për ndeshje.
– Vetëm një nga shtatë ndeshjet e fundit të luajtura mes këtyre dy formacioneve është mbyllur në barazim.
– Takimi i fundit i kampionatit, që është luajtur mes këtyre dy skuadrave në “San Siro”, është mbyllur 3-1 për Roma-n.
