Ndërkohë që bashkimi evropian e ka vendosur revolucionin digjital në zemër të politikëbërjes së tij, duhen marrë masa për të vënë korniza brenda të cilave të zhvillohet edhe inteligjenca artificiale. Ky është mendimi i presidentit ekzekutiv të Google, Sundar Pichai, njëkohësisht edhe bos i kompanisë simotër të saj Alphabet. Ai argumentoi para një audience në Bruksel, se kompani si e tija, një mostër e internetit me vlerë 1 trilionë dollarë, duhet të kenë zë njësoj si qeveritë në formulimin e një rregulloreje për inteligjencën artificiale.
Të gjithë ne, duhet ta bëjmë këtë së bashku – tha ai. “ Nuk kam asnjë dyshim në mendjen time kur them se inteligjenca artificiale duhet të rregullohet. Çështja është si ta bëjmë më mirë këtë”, tha Sundar Pichai. Apeli i tij vjen në një periudhë të rëndësishme. Evropa po tenton të hartojë një strategji digjitale që do të mund të konkurrojë me SHBA dhe Kinën. Inteligjenca artificiale, bashkë me rrjetet 5G, konsiderohet një fushë ku zhvillimet dhe aplikimet rrezikojnë të lënë pas rregullatorët nëse autoritetet nuk veprojnë shpejt.
Pas një muaji, komisioni evropian do të prezantojë propozimet e tij se si ai synon të krijojë rregulloret për inteligjecën artificiale në bllok. Sipas Pichait, teknologjia ka përfitime por edhe pasoja negative. Më 2018, Google u angazhua të mos përdorë inteligjencën artificiale në aplikacionet që lidhen me armët, vëzhgimet që shkelin normat ndërkombëtare apo punët që shkelin të drejtat e njeriut.
