Shqipëria feston sot 10-vjetorin e anëtarësimit në NATO, ndërsa në kryeqytetin shqiptar ndodhen përfaqësues të 29 vendeve anëtare. Prej orës 11:00 në sheshin “Nënë Tereza” po zhvillohen aktivitete të ndryshe, parakalime të mbi 2500 ushtarakëve, mbi 100 mjete ushtarake dhe helikopterë. Në këtë ditë të shënuar për Shqipërinë në aktivitet marrin pjesë ministra të Mbrojtjes dhe shefa shtabesh të vendeve anëtare dhe komandave të NATO-s, ambasadorë, atashe të akredituar në vendit tone, parlamentarë, flamurtarë të vendeve anëtare të NATO etj. Gjithashtu të pranishëm janë Presidenti Meta dhe kryeministri Rama, që kanë shtrënguar duart të buzëqeshur, pavarësisht ndasive dhe deklaratave të forta në muajt e fundit për shumë cështje. Si pasojë e aktiviteteve që po zhvillohen është bllokuar qarkullimi në bulevardin kryesor.
Edi Rama kërkoi nga partnerët europianë që të besojnë te shqiptarët, ashtu si NATO-ja para 10 viteve që e pranoi në Aleancë. “Buxheti i mbrojtjes për 2019 njeh një rritje 10%, ku përfshihet rritja e pagave për ushtarakët, do të vijojë modernizimi i FA-së. Jam i vetëdijshëm që nuk mjafton, viti që shkoi iu kushtua Skënderbeut. Falenderoj në emër të gjithë shqiptarëve aleatët tanë të mëdhenj, SHBA-në dhe europianët.
Procesi i integrimit duhet të vijojë në të njëjtën aftësi për të besuar te Shqipëria, që patën aleatët kur aprovuan anëtarësimin në NATO. Në një dekadë si pjesë e NATO-s, Shqipëria ka qenë mishërimi i shprehjes së Nënë Terezës ‘Jo të gjithë ne, mund të bëjmë gjerë të mëdha, por secili mund të bëjë gjëra të vogla me përkushtim të madh’. Këtë Shqipëria do të vijojë që ta bëjë. Të parët na kanë lënë një amanet ‘Dielli i shqiptarëve lind nga Perëndimi’ tha Rama.
