Instituti i Statistikave bën të ditur se, transporti i mallrave dhe pasagjerëve me rrugë ajrore shënoi rritje gjatë muajit korrik 2019, krahasuar me të njëjtën periudhë një vit më parë.
Fluksi i lartë i turistëve në vendin tonë ka shënuar rritje të ndjeshme gjatë muajit korrik, çka është shoqëruar edhe me rritje të numrit të pasagjerëve që kanë udhëtuar me rrugë ajrore.
Në muajin Korrik 2019, transporti ajror i pasagjerëve zuri 61,3 % të transportit gjithsej.
Sipas INSTAT, numri i pasagjerëve që kanë udhëtuar me linja ajrore, në shtatëmujorin 2019 është 1.796.867 pasagjerë duke u rritur me 11,2 %, krahasuar me të njëjtën periudhë të një viti më parë.
Instituti i Statistikave bën të ditur se, në këtë periudhë u rrit dhe valumi i mallrave të transportuara me linja ajrore.
Në muajin Korrik 2019, volumi i mallrave të transportuar me rrugë ajrore është 203 ton mallra duke u rritur me 12,5 % në krahasim me Korrik 2018.
Ndërsa si 7-mujor, me rrugë ajrore janë transportuar 1.348 ton mallra duke u rritur 7,4 %, krahasuar me të njëjtën periudhë të vitit 2018.
Numri i fluturimeve të kryera nga Aeroporti “Nënë Tereza”, Tiranë, në muajin Korrik 2019 është 3.216 duke shënuar një rritje me 16,6 %, ndaj muajit Korrik 2018, bën të ditur INSTAT.
