Politika shtetërore për të mbështetur me subvencione fermat dhe bizneset bujqësore eksportuese ka konfirmuar pritshmëritë e deritanishme.
Në nëntë muajt e parë të vitit 2017, sipas të dhënave të INSTAT vërehet një rritje prej 25% e eksporteve bujqësore, nga 16 miliardë lekë të një viti më parë, në 20 miliardë lekë.
Një rritje e tillë konfirmon trendin pozitiv në të cilin kanë hyrë eksportet bujqësore që prej disa vitesh.
Një vit më parë, eksportet bujqësore tejkaluan për herë të parë nivelin e 200 milionë eurove, një rritje kjo me 70% në vetëm tre vjet.
Megjithatë, nëse trendi i sivjetshëm do të konfirmohet edhe në tre muajt e fundit të vitit, atëherë 2017-ta pritet të mbyllet me rreth 250 milionë euro eksporte bujqësore, rreth 15% e totalit të eksporteve shqiptare.
Një shifër e tillë do të konfirmonte bujqësinë si një prej sektorëve më performues të ekonomisë shqiptare dhe njëkohësisht, do të ndihmonte pjesërisht, në kompensimin e rënies së të ardhurave prej eksportit të mineraleve dhe hidrokarbureve, kjo për shkak të çmimit të ulët në bursat ndërkombëtare.
Sa I përket partnerëve tregtarë, Italia ndiqet nga Kosova, Greqia dhe Spanja, sa I përket eksporteve tona bujqësore.
Aktualisht, grupi “ushqime, pije, duhan” është I katërti për nga vlera e eksporteve në ekonominë shqiptare, pas grupit “këpucë dhe tekstile”, “minerale dhe lëndë djegëse” e atij “materiale ndërtimi dhe metale”.
