Kryeministri Edi Rama, ka inspektuar këtë të martë bibliotekën e re të qytetit të Korçës, e cila do të kthehet në një hapësirë ku të rinjtë mund të mësojnë aftësi teknologjike dhe t’i vendosin më pas në zbatim, në tregun e gjerë global.
Rama, pasi përshkroi ambientet e brendshme të godinës dhe pa nga afër punën e bërë, tregoi se ky investim është pjesë e planit të veprimit të Partisë Socialiste në vitet 2021-2025.
Ai shtoi se fillimisht ky investim do të nisë në qendrat e disa qarqeve, duke u shtrirë më pas në të gjithë bashkitë e vendit.
“Ky është shembulli i parë i një zinxhiri sipas planit tonë të veprimit 2021-2025 do e shkrijmë gradualisht në qarqe dhe në të gjithë Shqipërinë. Ne duam që rinisë shqiptare t’i jepet një alternativë shumë e fuqishme përfshirjeje në tregun global, pa lëvizur nga shtëpia dhe të jenë aktor në një treg që ka shumë punë dhe të ardhura shumë më të mëdha se sa garanton tregu i brendshëm. Fakti që këtu ka filluar puna tregon që kjo s’është një ëndërr, por një program i nisur. Plani ynë i veprimit ka dhe investimin në këto qendra, stimulimin e të rinjve. Ne këtu me dy partnerë, me Bashkinë e Korçës dhe UBT e Prishtinës, jam i bindur që edhe falë një skuadre galaktikës të mbledhur këtu, ne do t’ia dalim ta trasnformojmë këtë ëndërr që tanimë po futet në rrugën e realitetit, duke nisur nga disa qendra qarqesh dhe duke u shtrirë në të gjithë bashkitë e vendit” , tha Rama.
