Kryeministri Edi Rama deklaroi ndër të tjera gjatë konferencës me ambasadorin Soreca se, disa kompani që dihet se janë likuide, kërkojnë më tepër ndihmë.
“Kam dëgjuar më shumë vëmendje shqetësimet, por i qëndroj asaj që kam thënë në fillim. Këtu jemi në kushtet kur kjo situate, që na gjeti të gjithëve, për të na sjellë më shumë halle, në të gjitha nivelet, ka nevojë të përballohet me mirëkuptim dhe duke i dhënë njerëzve më në nevojë e hall instrumentet e mbijetesës”, deklaroi Rama.
“Kam vënë re”, tha ai, “me keqardhje që kompani të cilat ne e dimë shumë mirë që janë likuide, janë në kushtet e kanë të gjithë kapacitetin për të përballuar goditjen e deritanishme, se nëse situata përkeqësohet në vijim, mund të kenë nevojë për më shumë ndihmë, janë pikërisht ato që kërkojnë më shumë”.
“Me keqardhje arrihet deri në inskenime për të krijuar zhurmë në media, si rasti i djeshëm për disa punonjës të sektorit fason, të cilët u pushuan nga puna pasi doli paketa e dytë mbështetëse, me qëllimin për të përfituar nga paketa pronari i tyre”, u shpreh Rama.
Ndërkohë, bëri të ditur kryeministri, ndërmarrja në fjalë është likuide e nuk ka problem të mëdha.
“Të gjithë ata që u larguan nga puna përpara datës 10 prill, ne i kemi vendosur në kategoritë që mbështesim”, deklaroi Rama.
Drejtoria e Përgjithshme e Tatimeve, bëri të ditur Kryeministri, po çon lutje me email për aplikime, për korrigjime aplikimesh, sepse një pjesë tanimë e vogël e atyre nuk kanë marrë ende pagën e luftës kanë bërë aplikimin gabim.
“Drejtoria e Përgjithshme e Tatimeve po çon lutje me e-mail me tekste për aplikime, për korrigjime aplikimesh. Sepse një pjesë tanimë e vogël e atyre që nuk kanë marrë ende pagën e luftës, ndërkohë që pjesa dërrmuese 60 e kusur mijë të tjerë po marrin transhin e dytë, kanë bërë aplikimet gabim. Por edhe një pjesë e kompanive, e sipërmarrësve nuk kanë aplikuar për paketën e zgjeruar për punonjësit e tyre. Ne këtë do ta ndëshkojmë. Por po presim reflektimin se nuk është koha për të përdorur ndëshkimin, është koha për të gjetur mirëkuptimin dhe për të qenë të gjithë shqiptarë të mirë. Sigurisht që dhe ndëshkimi vjen më pas”, tha Rama.
