Lulzim Basha ka premtuar këtë të martë, se shqiptarët do të mësojnë 5 gjuhë të huaja kur ai të vijë në pushtet.
“Ne e dimë se ku qëndrojnë problemet në vendin tonë. Të rinjtë po largohen nga Shqipëria me një ritëm të paparë për 30 vitet e fundit, madje me një ritëm më të shpejtë krahasuar me vendet e tjera të Ballkanit.
Po t’i krahasojmë, për çdo të ri serb që po largohet nga Serbia, 12 është numri i të rinjve shqiptarë që largohen nga Shqipëria. Shumica e tyre po largohen drejt Bashkimit Evropian”, tha Basha.
“Ne po humbasim me një ritëm shumë të shpejtë njerëzit që na duhen më shumë, në mënyrë që të ndërtojmë ekonominë tonë, në mënyrë që të ecim përpara, në mënyrë që të bëjmë të mundur që Shqipëria të përqafojë mundësitë dhe standardet e Bashkimit Evropian.
Si ta zgjidhim këtë problem? Sigurisht që ne jemi dhe kemi qenë ato të cilët kemi mundësuar lëvizjen e lirë.
Partia Demokratike ishte në qeverisje dhe unë isha ministri i brendshëm kur arritëm të fitojmë liberalizimin e vizave që bëri të mundur që të rinjtë të lëviznin lirshëm.
Unë vetë jam produkt i lirisë për të shkuar në Evropën Perëndimore dhe për të marrë një arsimim atje. Pra, kjo nuk është diçka që duam ta përdorim si dekurajim.
Përkundrazi, kjo është diçka që ne duam të inkurajojmë dhe unë jam i lumtur sot kur dëgjoj se për herë të parë në histori, falë komisioneres Gabriel dhe Komisionerit Evropian, ne kemi një rekord historik në një buxhet prej 26 miliardë euro.
Komisionere, unë mendoj që ju thatë se kjo do t’i kushtohet kësaj axhende dixhitalizimi vetëm për sa i përket Ballkanit Perëndimor dhe gati 100 miliardë euro për Bashkimin Evropian në tërësi”, vijoi kreu i PD.
Premtimi i Bashës u bë në një takim online me pjesëmarrjen e komisioneres së BE-së për Inovacionin, Arsimin dhe Rininë, Mariya Gabriela.
Ndërkohë, ndërsa ka premtuar kurse falas për të mësuar 5 gjuhë të huaja, Lulzim Basha ka injoruar matematikën, duke mos premtuar ndonjë kurs falas, edhe pse është shfaqur shpesh si një person i apasionuar pas aritmetikës.
