Një tjetër artist i madh i skenës shqiptare u shua mbremjen e djeshme. Mjeshtri i Madh, tenori Gaqo Çako është ndarë nga jeta në moshën 83-vjeçare. Gaqo Çako la pas shumë kujtime dhe këngë të dashura për publikun shqiptar.
Familjarë, miq, të afërm, artistë e personalitete të shumtë i dhanë sot lamtumirën e fundit artistit të madh të skenës shqiptare Gaqo Çako. Homazhet në nder tij, u zhvilluan në ambjentet e Muzeut Kombëtar.
Reagimet nga politika:
Pas lajmit të ndarjes nga jeta të Gaqo Çako reagoi kryeministri Edi Rama duke shprehur ngushëllimet. Ai e quan Gaqo Çakon një emër që i mbetet historisë së kënduarit shqip.
Kreu i shtetit Ilir Meta shpreh ngushëllimet për ndarjen nga jeta të artistit të mirënjohur shqiptar, Gaqo Çako.
“Nderi i Kombit tonë, mjeshtri i përsosur Gaqo Çako ka lënë gjurmë të pashlyeshme në interpretimet e operave në skenat shqiptare e botërore si dhe ato të këngëve të muzikës së lehtë shqiptare, me ndarjen e tij nga jeta po le një boshllëk të madh artistik e shpirtëror ne trashëgiminë tonë artistike dhe në mes të bashkësisë së artistëve, kolegëve dhe të artdashësve shqiptarë, kudo ku ndodhen.
Një ata që reaguan mbi vdekjen e artistit Gaqo Çako ishte edhe kryetari i Kuvendit Gramoz Ruçi, i cili në mesazhin e tij është shprehur se humbëm bilbilin e Shqipërisë, i cili me këngët e tij na e bëri më të dashur atdheun.
Na iku Gaqo Çako, një bilbil i Shqipërisë. Gaqo Çako, Artist i Popullit, me këngët për popullin. Ai ishte kurorë dafine e këngës shqiptare. Këngët e tij na e bënë Shqipërinë më të bukur, më të dashur.
Kush ishte Gaqo Çako:
Gaqo Çako lindi më 24 janar 1935. Tenori legjendar, që mban titullin Artist i Popullit, është i rreshtuar në emrat e mëdhenj të Panteonit të muzikës shqiptare si Ramiz Kovaçi, Mentor Xhemali, etj.
Midis viteve 1957 dhe 1961 ai studioi në konservatorin “Çajkovski” të Moskës nën drejtimin e pedagoges Anna Soloviova. Pas kthimit në Shqipëri më 1961 ai u emërua tenor i përhershëm i Teatrit të Operës dhe Baletit të Tiranës, ku këndoi shumë nga rolet e para të repertorit operistik, duke u bërë kështu tenori kryesor për tri dekada me radhë.
Përvoja dhe karriera e tij mjaft e pasur në operat “Traviata”, “Bohema”, “Rigoleto”, “Norma”, etj, si dhe operat shqiptare “Mrika” e Prenk Jakovës, “Lulja e kujtimit” e Kristo Konos, “Pranvera” e Tish Daisë, “Heroina” e Vangjo Novës, “Skënderbeu” i Prenk Jakovës e “Skënderbeu” i Abdulla Grimcit, “Komisari” i Nikolla Zoraqit, “Zgjimi” i Tonin Harapit, “Toka e jonë” e Pjetër Gacit, etj, i dhanë atij një karrierë të shkëlqyer. Mjaft i njohur edhe në skenat italiane, ku ai ka mbaruar konservatorin e Santa Cecillias.
Zëri i tij u kthye në objekt kënaqësie kudo që ai u dëgjua e u shfaq, në opera, në televizion, në radio, në salla të mëdha a të vogla koncerteshEdhe pse vlerën më të madhe ai e pati në interpretimet e roleve operistike, ai u popullarizua nëpërmjet këngës, veçanërisht atyre të Festivaleve të Radios.
Përgatiti: AlpeNews.al
