Kristjan Breshanaj, para se të ekzekutohej në muajin Maj 2020 ishte duke luajtur me letra në një lokal që ndodhet shumë pranë kompleksit “Oslo” në Vlorë. Ai ndodhej nën shoqërinë e disa prej miqve të tij në Vlorë, ku pasi kanë përfunduar lojën me letra, Breshanaj dhe miku i tij, janë larguar të dy së bashku në këmbë drejt banesës së Kristjan Breshanaj.
Qëllimi për të cilin shoku e ka shoqëruar deri në momentin kur Breshanaj është qëlluar me armë, ka qenë marrja e një palë atleteve në shtëpinë e Kristjanit. Por kur të dy djemtë janë afruar në mesnatë pranë derës së shtëpisë, një person që ecte në këmbë është afruar pranë tyre dhe ka qëlluar fillimisht me një plumb drejt Kristjan Breshanaj.
Shoku që e shoqëronte, ka deklaruar në polici se është trembur shumë kur Kristjani është rrëzuar në tokë dhe është larguar me vrap, duke mos arritur të shquajë asnjë karakteristikë për identifikimin e autorit. Ky i fundit mësohet të jetë qëlluar dhe tre herë të tjera nga një distancë e afërt, duke e lënë të vdekur në vend.
Ndërkohë pas krimit të rëndë autorët e ngjarjes janë larguar me shpejtësi duke djegur makinën në një lagje tjetër të Vlorës. Për ngjarjen janë shoqëruar disa persona, të cilët pasi janë marrë në pyetje sërish u liruan nga policia. Kristjan Breshanaj, kishte vetëm tre muaj që ishte deportuar nga Belgjika, ndërkohë rezultonte i dënuar për drogë nga gjykata e Vlorës. Breshanaj, rridhte nga një familje e rregullt në Vlorë pasi babai i tij, Edmond, punon si mjek në spitalin e Vlorës, ndërsa nëna mësuese.
