I fokusuar tek situata e rëndë që prodhoi tërmeti shkatërrimtar i së martës, Presidenti Ilir Meta duket se ka shtyrë në kohë organizimin e ceremonisë së betimit të tetë prokurorëve të Prokurorisë së Posaçme. Në datën 25 nëntor, Këshilli i Lartë i Prokurorisë emëroi 8 prokurorë në Prokurorinë e Posaçme.
Që prokurorët të nisin detyrën, duhet të betohen në Presidencë. Një ditë pas emërimit të prokurorëve, Durrësi, Tirana dhe Lezha u goditën nga një tërmet 6.4 rihter, duke lënë pas 51 viktima, mijëra shtëpi dhe qindra pallate të rrënuara, situatë e cila duket se e ka nxjerrë çështjen e betimit të prokurorëve të SPAK-ut nga axhenda e Presidentit.
Ndërkaq, 12 ditë para tërmetit, deputeti demokrat Myslim Murrizi, në mbledhjen e Konferencës së Kryetarëve, ka paralajmëruar mazhorancën se Presidenti Ilir Meta nuk do të lejojë prokurorët e SPAK-ut, për të bërë betimin para tij në Presidencë.
Duke iu referuar edhe precedentit me anëtaren e Gjykatës Kushtetuese, Arta Vorpsi, e cila nuk u pranua nga Meta për të bërë betimin, Murrizi ka parashikuar që në 14 nëntor, se Meta do të operojë në të njëjtën mënyrë edhe me prokurorët e SPAK-ut, duke bllokuar funksionimin e strukturës së re që do të luftojë krimin dhe korrupsionin në të gjitha nivelet.
Për të zhbllokuar SPAK-un dhe Gjykatën Kushtetuese nga bllokada e kreut të shtetit, Murrizi kërkoi që Kuvendi të ndryshojë sa më parë Kushtetutën. Deputeti propozoi se ndryshimi i Kushtetutës të bëhet në koordinim me faktorin ndërkombëtar, sidomos me Ambasadën Amerikane në Tiranë.
“Z. Balla, po të drejtohem ty drejtpërdrejt, edhe për SPAK-un e ke me ligj të Fatmirit, se do të betohet te Presidenti. Nuk t’i qas. Do të shkoni përsëri te noteri me SPAK-un? Hajdeni vërdallë përsëri! Po nuk janë ata që do ai, nuk jua hap derën e kishës për të vënë dorën në Kushtetutë. Çfarë do të bëni? Më mirë merrni briskun në dorë. Nuk bëhet kjo punë duke mjekuar plagët me gjethe. Merrni briskun në dorë, çajeni dhe hajdeni, se nuk ka asgjë të keqe.
Flisni me burrat a gratë e “Rrugës së Elbasanit” dhe hajdeni të bëjmë një ndryshim kushtetues! Ku ka çaluar, sepse e bëtë me nxitim, hajdeni ta bëjmë! Nuk do t’ju betohen më. Do të shkojnë të betohen te SPAK-u vetëm ata që do ai. Çfarë do t’i bëni deri kur do ta hiqni? Opingat! Gjykatën Kushtetuese nuk e bëni dot që të japë vendimin, nëse do të qëndrojë në punë me ata apo jo. Si do ta zgjidhni? Ai thotë: “Nëse nuk është nga Skrapari nuk fillon punë në SPAK”. Çfarë i bën ti?! Nuk ta hap derën, e ka si dyqan privat”, është shprehur Murrizi.
