I vihet flaka makinës luksoze të një biznesmeni në qytetin e Vlorës. Policia bëri të ditur se është djegur totalisht një automjet tip “BMW”, seria 7. Ngjarja ndodhi në lagjen “4 Heronjtë”, kur pronari i mjetit, Everest Meçorapaj, ka konstatuar se mjeti që ishte parkuar në oborrin e shtëpisë së tij private, ishte përfshirë në flakë. Në pamundësi për të ndërhyrë, 27-vjeçari ka njoftuar forcat zjarrfikëse dhe Policinë.
Por pavarësisht ndërhyrjes së këtyre të fundit, automjeti është djegur thuajse plotësisht. Nga hetimet e para ka rezultuar se makina ishte spërkatur me lëndë djegëse “benzinë” dhe më pas i është vënë flaka. Gjithçka ka ndodhur në orët e para të mëngjesit të ditës së djeshme, ndërsa autorët të cilët ende nuk janë identifikuar nga Policia, janë larguar menjëherë nga vendi i ngjarjes. Sipas Policisë, ngjarja është e qëllimshme pasi nga hetimet paraprake ka rezultuar se autorët e kanë spërkatur të gjithë automjetin me benzinë dhe më pas i kanë vënë flakën. Pronari i mjetit, 27-vjeçari Meçorapaj, njihet në qytetin e Vlorës si një tregtar shitblerjesh automjetesh si dhe familja e tij menaxhon një biznes tjetër tregtar (dyqan). Policia bëri të ditur se pista kryesore e hetimit ka të bëjë me aktivitetin e të riut me shitblerjen e makinave, ku nuk përjashtohet dyshimi që ai të ketë pasur ndonjë konflikt nga ndonjë blerës i pakënaqur me makinën. Gjithashtu, nuk përjashtohet as pista e konkurrencës apo konflikteve të tjera të 27- vjeçarit.
Gjatë dëshmisë së dhënë për grupin e hetimit, Meçorapaj ka mohuar që të ketë pasur ndonjë grindje me persona të caktuar, që mund të kenë çuar deri në vendosjen e zjarrit në automjet. “Nuk kam asnjë konflikt të hershëm, ndaj nuk kam dijeni se kush mund të jetë autori që dogji makinën në mënyrë të qëllimshme. Nuk e kam idenë se për çfarë ka ndodhur kjo ngjarje, pasi nuk kam pasur asnjëherë konflikte”, është shprehur 27-vjeçari.
PRECEDENTËT E DJEGIEVE TË MAKINAVE
Qyteti i Vlorës ka shënuar disa ngjarje të djegies së makinave në mënyrë të qëllimshme apo edhe të vendosjes së tritolit në to. Në të shumtat e rasteve të djegieve, Policia ka deklaruar se ngjarja ka qenë aksidentale për shkak të shkëndijave elektrike. Por duket se të shumtat e këtyre ngjarjeve kanë një autor nga pas, të cilët mbeten të paidentifikuar.
