Deputeti i Lëvizjes Vetëvendosja, Mirsad Shkreta, ka reaguar për vjedhjen e 50 mijë eurove dhe stolive me vlerë 10 mijë euro, që ka ndodhur në banesën e tij.
Në një postim në “Facebook”, deputeti Shkreta e lidh ngjarjen me postim e tij, ndërsa shton se i ka përmbushur detyrimet sipas ligjit në lidhje me deklarimin e pasurisë dhe të njëjtën gjë do ta bëjë edhe në mars të vitit 2023.
“Vetëm që 1 vit e gjysmë kam marrë detyrën e deputetit, asnjëherë nuk kam pasur pozita ekzekutive dhe i kam përmbushur sipas ligjit të gjitha obligimet e mia në lidhje me deklarimin e pasurisë. Të njëjtën do ta bëj edhe për deklarimin e këtij viti në mars të vitit 2023, ashtu siç thotë ligji. Prandaj, tendenca për ta lidhur gjithçka me këtë post është qëllimkeqe dhe thellësisht e padrejtë, aq më tepër kur e njëjta lidhet edhe me qëndrimet dhe deklarimet e mia politike”, ka shkruar Shkreta.
