Presidenti Ilir Meta ka dhënë një përgjigje të prerë për gazetarët pasi u pyet nëse do e jepte dorëheqjen nga posti që mban për shkak të zhvillimeve politike dhe asaj që ai e quan kapjen nga mazhoranca të sistemit të drejtësisë dhe institucioneve si Gjykata Kushtetuese.
Ai tha se do jetë në detyrën e kreut të shtetit deri me 24 korrik 2022.
“Së pari është përgjegjësia ime ti qëndroj atij betimi që kam bërë me doren në Kushtetutë dhe me zemrën në Kushtetutë deri në datën 24 korrik 2022. Se cfarë bën Kuvendi i Shqiperise e shohin gjithë shqiptarët.
Po të bënte gjëra më të mira, s’do largoheshin nga Shqiperia 8 shqiptare, kur nga Serbia largohet një serb. Nuk ekziston asnjë mundësi që presidenti për shkak të avancimit të grushtit të shtetit të tërhiqet nga detyra e tij si kryetar i shtetit dhe nga detyra e misioni i tij për te mbrojtur kushtetuten”, tha kreu i shtetit.
Meta tha se pse nuk donte që të vinte Komisioni i Venecias në Tiranë.
“Pse nuk kam qenë për të thirrur Venecian, unë kam qenë partizani kryesor edhe si kryetar i Kuvendit që reformën në drejtësi të vetmin konsensus ta realizonim vetëm mbi Venecian, sepse nuk ka pasur mundësi tjetër në vend që palët të pranonin dhe të mos e kontestonin se Venecia është pranuar nga cdo palë në Shqipëri.
Vetëm bazuar mbi këto rekomandime arritëm konsensus që luftova aq shumë për ta imponuar se përpjekja ishte që grushti i shtetit të realizohej mes një maskarade në Kuvend duke blerë deputetë të opozitës dhe shantazhuar dhe kjo dështoi dhe tani cdo ditë ka pasur nga pak grusht shteti për të arritur deri këtu që edhe Gjykata kushtetuese të rrëmbehet dhe kthehet në polici antikushtetuese të shtetit të PPP-së.
Nuk kishte gjë më fyese për ne vetë, Venecian të vijë për këtë gjë? A ka ndonjë fëmijë që të mos e kuptojë që neni 179 shkruar nga vetë Venecia e thotë qartë, anëtari i parë emërohet nga Presidenti i dyti nga Kuvendi dhe i treti nga Gjykata e lartë dhe radha ndiqet qartësisht.
Këta duan të vënë në dyshim intelektin e njeriut më të thjeshtë, cdo ditë do keni prova më të rënda se këto që unë po ju them”.
