Pavarësisht se jemi ndër popujt më të varfër, me rrogat më të ulëta dhe me normat më të larta të papunësisë në Europë (përveç, Kosovës, Ukrainës e Moldavisë), sërish jemi ndër më diskriminuesit me personat që kanë pak të ardhura.
Sipas sondazhit të Komisionit Europian, të jesh pa të ardhura apo pa një punë në Shqipëri ke më shumë mundësi të ndihesh i diskriminuar se në çdo vend tjetër të Europës.
33% e shqiptarëve janë përgjigjur se bien dakord me pohimin “Disa njerëz më shohin me përçmim për shkak të situatës me punën ose të ardhurat”. Kjo përqindje është shumë më e lartë sesa mesatarja e Bashkimit Europian prej 14% dhe po ashtu, edhe në krahasim me vendet e tjera të rajonit.
Vetëm 11% e malazezëve pohojnë se ata shihen me përçmim për shkak të situatës me punën dhe të ardhurat, 18% e turqve, 19% e serbëve dhe 20% e maqedonasve.
Pas Shqipërisë renditet Rumania (27%), ndërsa shtetet që e kanë më të ulët përçmimin ndaj të varfërve janë Suedia, Spanja dhe Sllovakia, me vetëm 8%.
Ata që ndihen më shumë të diskriminuar janë meshkujt, me 36% të tyre që kanë rënë dakord me pyetjen, në raport me 30% të femrave shqiptare.
Adoleshentët shqiptarë nuk e vrasin shumë mendjen, teksa 19% e grupmoshës nga 18-24 vjeç binin dakord me pohimin në fjalë. Ata që e vuajnë më shumë janë të rinjtë e moshës nga 25-34 vjeç, kur dhe pritshmëritë ndaj tyre janë më të larta.
Të varfrit e ndiejnë më shumë, me 44% të grupit I (ku kategorizohen ata me të ardhura më të ulëta) pohojnë se shihen shtrembër pasi nuk kanë një punë të mirë apo shumë të ardhura.
Për vitin 2018, Shqipëria vlerësohet të ketë të ardhura për frymë prej 5261 dollarësh, në vend të 102 nga 191 shtete, duke u përmirësuar me katër vende në raport me 2017-n, kur ishte në pozicionin e 106. Kosova, me të ardhura për frymë prej 4,324 dollarësh, renditet e 112-a.
