Një 33-vjeçar ka mbetur i vdekur dhe një 38-vjeçar i plagosur, pasi hynë në një pus për ta pastruar, por mbeten brenda tij. Ngjarja e rëndë ka ndodhur mesditën e së dielës në Mallakastër, ku Bledar Bregu ndërroi jetë teksa po shkonte në spital.
Ndërsa Besnik Veliaj tani ndodhet në spital nën kujdesin e mjekëve dhe jashtë rrezikut për jetën. Kjo ngjarje u risoll në vëmendjen e publikut në emisionin “Shqipëria Live”, ku në studio ishte i ftuar Reonardo Zotaj shefi zjarrfikëses Mallakastër, i cili ka qenë i pari në vendin e ngjarjes.
Sipas tij, kanë qenë shtatë persona në operacion dhe vetëm një prej tyre është futur brenda në pus.
“Në ishim 7 veta në operacion. Jemi në sezonin e gatishmërisë tani në sezonin e verës. Kemi rrezikuar jetën tonë. Ishin me shenja jete, kemi komunikuar me të dy”, tha shefi i zjarrfikëses.
I pyetur nëse ka pasur ndonjë shpërthim, ai u shpreh se nuk e mendon një gjë të tillë.
“Mallakastra njihet për zonë naftëmbajtëse, por shkaku kryesor ka qenë pjesa e pompës me benzinë. Nga çlirimi i gazrave që ka bërë pompa, dy personat janë asfiksuar. Pjesa më e madhe përdoret elektrike, por kësaj radhe kanë përdorur atë elektrike. Është një gabim që nuk duhet bërë. Nuk do të kishte ndodhur kjo që ndodhi nëse do të ishte pompë elektrike”, tha Zotaj.
