Është arrestuar në Malin e Zi nga Interpol, Anton Gjini, i cili njihet ndryshe me emrin Pashk Rrapi. Mediat malazeze shkruajnë se ai është arrestuar dy ditë më parë në kufirin e Malit të Zi, në pikën kufitare Bozaj.
55-vjeçari ka tentuar që të kalojë kufirin dhe emri i tij ka dalë në listën e Interpol Madridit, pasi në vitin 2006 është kapur me 50 kg heroinë. Anton Gjini rezulton që të ketë disa biznese në Shqipëri, në fushën e ndërtimit.
Sipas Ministrisë së Brendshme të Malit të Zi, Anton Gjinaj është anëtar i një organizate kriminale, e cila në vitin 2006 organizoi dhe koordinoi importimin, magazinimin dhe shitjen e mëtejshme të 50 kilogramëve heroinë në territorin e Spanjës, në zonat përreth qyteteve të Murcia dhe Alicante.
‘Bazuar në njohuritë operacionale, dhe më vonë në verifikimin dhe konfirmimin e identitetit, u përcaktua se ky person kërkohej nën një identitet tjetër nga NCB Interpol Madrid, në mënyrë që të vuante një dënim me burg prej tetë vjet e nëntë muaj për krimin e trafikut të drogës – shprehet ai në një deklaratë të policisë. Një gjykatës i Lartë ka urdhëruar ndalimin e tij në paraburgim derisa të verifikohet ekstradimi.’- njofton policia në Malin e Zi.