Policia Kufitare e Durrësit ka vënë në pranga shtetasin italian Antonio Goffredo, i shpallur në kërkim ndërkombëtar nga Interpol Caracas.
51-vjeçari u kap në Portin e Durrësit, teksa tentonte të largohej nga Shqipëria. Sipas autoriteteve, ai ishte shpallur në kërkim që nga viti 2017, pas një vendimi të Gjykatës së Caracas, e cila i kishte caktuar masën e sigurisë “Arrest në burg” për veprën penale të mashtrimit.
Aktualisht, Interpol Tirana po bashkëpunon me autoritetet e Interpol Caracas për të realizuar ekstradimin e tij në Venezuelë.
Njoftimi:
Port, Durrës
Kapet nga Policia Kufitare dhe arrestohet me qëllim ekstradimin në Venezuelë, një 51-vjeçar i shpallur në kërkim ndërkombëtar.
Shërbimet e Policisë Kufitare në Portin e Durrësit, bazuar në informacionet e siguruara nga inteligjenca policore se një shtetas në kërkim ndërkombëtar do të udhëtonte drejt Italisë, kanë intensifikuar kontrollet për kapjen e tij.
Si rezultat, u kap në tentativë për të dalë nga Shqipëria dhe u arrestua me qëllim ekstradimin, shtetasi italian A. G., 51 vjeç, banues në Itali.
Ky shtetas ishte shpallur në kërkim ndërkombëtar nga Interpol Caracas, pasi Gjykata e Caracas, në vitin 2017, i ka caktuar masën e sigurisë “Arrest në burg”, për veprën penale “Mashtrimi”, parashikuar nga Kodi Penal i Venezuelës.
Interpol Tirana vijon bashkëpunimin me Interpol Caracas, për ta ekstraduar këtë shtetas, në Venezuelë.
