Një tjetër emër i njohur i botës së krimit pritet të ekstradohet sot pasdite (2 maj) nga Dubai.
Ai është Florenc Çapja, kreu i organizatës kriminale me të njëjtën emër në Elbasan prej gati dy dekadash dhe i akuzuar për disa krime të rënda, i shpallur në kërkim nga SPAK dhe GJKKO.
Policia e Shtetit konfirmoi se do e kryejë sot operacionin e ekstradimit nga Emiratet e bashkuara Arabe.
Në vijim të bashkëpunimit mjaft të mirë me partnerët, si në aspekte hetimore, ashtu dhe në ato operacionale, dhe si rezultat i shkëmbimit të menjëhershëm të informacionit mes strukturave të specializuara për lokalizimim dhe kapjen e shtetasve në kërkim ndërkombëtar, me qëllim ekstradimin, pasditen e sotme, do të finalizojë me sukses një tjetër fazë të operacionit ndërkombëtar të koduar “The Ëanted”. Në kuadër të këtij operacioni, pritet që pasditen e sotme, të finalizohet me sukses ekstradimi nga Dubai, i të shumëkërkuarit F. Ç., 44 vjeç, banues në Elbasan”, thuhet në njoftimin zyrtar.
Më tej sqarohet se për informacione më të detajuara, do jepet njoftim në momentin e finalizimit të operacionit të ekstradimit në Rinas, dinamika e të cilit mbahet sekret për arsye sigurie.
Florenc Çapja dhe Ardian Çapja akuzohen si drejtuesit e kësaj organizate kriminale, teksa i dyti është i arrestuar dhe burgosur prej disa vitesh. Florenci mundi t’i shpëtonte arrestimit gjatë operacionit të koduar “Plumbi i Artë”, pas rrëfimeve të kreut të grupit të vrasësve me pagesë, Nuredin Dumani, duke u fshehur në Dubai, ku dhe nisën procedurat për arrestim dhe ekstradim.
Vitet e fundit grupi “Çapja” sipas përgjimeve, hetimeve dhe rrëfimeve të Dumanit, kishte hyrë në konflikt të përgjakshëm edhe me organizatën e Suel Çelës, po në Elbasan.
Një prej dosjee penale në ngarkim të tij është edhe ajo e atentatit të vitit 2006 me motive hakmarrjeje ndaj të ndjerit Fadil Mema, ish-shefit të Rrugores së Elbasanit, që mbeti i plagosur. Çapja ishte arrestuar dhe hetuar atëkohë si i dyshuar, por Gjykata e liroi më pas për mungesë provash.
Mema u vra në Torino të Italisë më 2015 teksa shpërndante gazeta dhe si organizatorë dhe porositës dyshohet po fisi Çapja, edhe pse nuk ka ende prova direkte.
Prej disa vitesh SPAK dhe GJKKO vijojnë procesin e hetimit pasuror, duke sekuestruar disa asete të tij në Pogradec dhe Elbasan.
