Dan Hutra, autori i masakrës së ndodhur disa ditë më parë në Tiranë ku vrau 3 gra dhe plagosi 3 të tjera ka dalë sot para gjykatës për t’u njohur me masën e sigurisë.
Gjatë seancës, Hutra ka pranuar krimin, ku deklaroi se vrasjet i kishte planifikuar dhe shtoi se kishte motivet e tij.
Hutra u shpreh se nuk i ka bërë asgjë ish-bashkëjetueses së tij, Elena Hysa, ndaj sipas tij, dënimi për dhunën në familje ka qenë i kotë.
“Kur më dënuan për dhunë në familje më dënuan pa asnjë provë, ndaj i bëra të gjitha. I pranoj të gjitha dhe nuk jam i penduar.
Etleva Kurtin e vrava se i vëllai deshi të më helmojë në burg.
I kam bërë të gjitha të menduara dhe nuk jam i penduar. Për të gjitha ngjarjet kisha motivet e mia”, – tha Hutra.
Hutra ishte i qetë përballë gjykatës dhe kishte veshur bluzën që kishte pasur kur kreu vrasjet, teksa në të dalloheshin edhe njolla gjaku.
