Ai ishte afruar në ekipin e Kamzës që prej disa ditësh, por vetëm gjatë kësaj të marte është bërë prezantimi zyrtar. Portieri bullgar Mario Kirev ka firmosur kontratën dhe tashmë do të jetë në dispozicion të trajnerit Klodian Duro për ndeshjet e ardhshme në kampionat.
Lajmi i zyrtarizimit është dhënë përmes rrjeteve sociale nga vetë klubi i Kamëz, ku shkruhet, “Portieri Mario Kirev prezantohet zyrtarisht në skuadrën tonë. Bullgari, ashtu siç ishte bërë e ditur më parë, ka firmosur një kontratë 1-vjeçare me klubin”
Kirev pritet të jetë një vlerë e shtuar në ekipin e Kamzës. Ai është formuar si lojtarë në Akademinë e Juventusit, por pa arritur të bëjë karrierë aty, apo qoftë edhe në ndonjë ekip tjetër në Serie A. Sezonin e fundit Kirev ka luajtur për skuadrën e Nea Salamis në Qipro.
Kamza pas humbjes në Durrës me Teutën ndërroi edhe trajnerin, duke larguar Bledar Devollin dhe ulur në stol, Klodian Duron. Kjo periudhë do të tentohet të shfrytëzohet në maksimum nga ekipi kamzali për të kapur formën e duhur dhe të rikthehen te rezultatet pozitive me rifillimin e kampionatit që nga java e katërt.