Detaje tronditëse janë zbuluar nga vdekja e 64-vjeçarit në Gjirokastër si pasojë e zjarrit të rënë ditën e djeshme.
ABC mëson se fillimisht 64-vjeçari Andrea Haxhiaj është asfiksuar nga tymi dhe më pas ka mbetur mes flakëve ku edhe është djegur. Në ndihmë të tij mësohet se ka shkuar gruaja e tij por edhe ajo ka pësuar djegie të mëdha në trup dhe ndodhet në gjendje kritike për jetën.
Çifti kishte dy fëmijë, njëri prej tyre kishte telefonuar prindërit por asnjë prej tyre nuk i ishte përgjigjur. Ishte ai i cili ka telefonuar më pas të afërmit duke dhënë alarmin për prindërit e tij.
64-vjeçari Andrea Haxhiaj, i cili humbi jetën tragjikisht për shkak të flakëve të rëna pranë shtëpisë së tij në fshatin “Asim Zeneli” në Gjirokastër është përcjellë këtë të mërkurë në banesën e fundit. 64-vjeçari është viktima e parë e shënuar nga zjarret që kanë përfshirë ditët e fundit vendin tonë.
Ndërkohë situata me zjarret në vendin tonë vijon të jetë e rëndë.
