Voltana Ademi shprehet se Ministria e Financave dhe Ekonomisë ka penguar funksionimin e Bashkisë Shkodër, përmes bllokimit të procedurave të likuidimit me fondet e veta, mbi shërbimet dhe investimet.
Ajo i është drejtuar me një letër ministres së Financave, Anila Denaj, në dijeni edhe të ambasadorëve në Tiranë.
“Me këto veprime të jashtëligjshme nuk po bllokoni kryetaren e Bashkisë së Shkodrës, por qytetarët dhe shërbimet ndaj tyre”, thuhet në letër.
Por sipas Drejtorisë së Përgjithshme të Thesarit, Voltana Ademit i ka mbaruar mandati ditën e sotme, në orën 16:30.
“…sipas ligjit, kryetares së Bashkisë i mbaron mandati më datë 20.08.2019, ora 16:30 sipas orarit zyrtar, për ditët në vijim do të jetë këshilli bashkiak që duhet të zgjidhë problemin”, thuhet në email- in dërguar Ademit.
Në përgjigje, Bashkia e Shkodrës thotë se nuk është Ministria e Financave ajo që gjykon për mandatin e kryetarit të bashkisë, ndërsa thuhet se për këtë veprim të paligjshëm do të vihen në dijeni autoritetet lokale dhe rajonale të Këshillit të Europës dhe përfaqësitë diplomatike në vendin tonë.