Pas hetimeve për abuzimin me kompensimin financiar të një objekti të kompensuar më parë, Prokuroria e Tiranës ka kërkuar 2 vite burgim për ish-Sekretarin e Ministrisë së Financave Arlind Gjokutaj.
Ish-zyrtari u hetua fillimisht me masën e sigurisë arrest në burg dhe më pas Apeli e liroi, ndërsa prokurori Ndini Tavani kërkon që për veprën penale shpërdorim detyre, sipas nenit 248 të Kodit Penal, Gjokutaj të dënohet.
Gjykata është shprehur se vendimi do shpallet më 17 Tetor, teksa pala mbrojtëse pretendon pafajësinë.
Njoftimi i GJKKO:
Prokuroria e Posaçme kundër Korrupsionit dhe Krimit të Organizuar me datë 13.09.2024 ka paraqitur pranë Gjykatës kërkesën me objekt: “Miratimin e marrëveshjes së fajësisë me të pandehurin Avni Bashukaj, datë 10.09.2024”, i cili akuzohet për kryerjen e veprës penale “Korrupsion aktiv i gjyqtarit, prokurorit dhe i funksionarëve të tjerë të drejtësisë” parashikuar nga neni 319 i K.Penal.
Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e Organizuar me trup gjykues të përbërë nga gjyqtarët Rudina Palloj, Irena Gjoka dhe Elsa Ulliri, me vendimin nr. 55, datë 08.10.2024 vendosi:
Miratimin e marrëveshjes “Mbi kushtet e pranimit të fajësisë dhe caktimin e dënimit”, mbi procedimin penal nr. 46, të vitit 2024 të Prokurorisë së Posaçme, me datë 10.09.2024, nënshkruar nga prokurori i çështjes, i pandehuri Avni Bashukaj dhe mbrojtësi i tij av. Pranvera Doçi.
Deklarimin fajtor të të pandehurit Avni Syl Bashukaj, për kryerjen e veprës penale “Korrupsioni aktiv i gjyqtarit, prokurorit dhe i funksionarëve të tjerë të drejtësisë”, parashikuar nga neni 319 i Kodit Penal dhe në bazë të kësaj dispozite dënimin e tij me 1 (një) vit burgim (sipas marrëveshjes me datë 10.09.2024).
Në zbatim të nenit 59 të Kodit Penal, urdhërohet pezullimi i ekzekutimit të dënimit me burgim dhe vënia në provë e të pandehurit Avni Syl Bashukaj, për një periudhë kohe prej 2 (dy) vitesh, me kusht që i pandehuri të mos kryejë vepër tjetër penale dhe të mbajë kontakte me Shërbimin e Provës që mbulon vendbanimin e tij (sipas marrëveshjes me datë 10.09.2024).
Shpenzimet procedurale në fazën e hetimit paraprak në masën 10.616 (dhjetë mijë e gjashtëqind e gjashtëmbëdhjetë) lekë dhe ato të gjykimit, i ngarkohen të pandehurit.
Në referim të nenit 406/f, pika 1, të KPr.Penale, kundër vendimit nuk lejohet ankim.
