Në llogarinë e hapur në “gofundme” është mbledhur tashmë shuma e nevojshme për të sjellë trupin e pajetë të Sidorel Myzeqarit në Shqipëri. 28-vjeçari shqiptar ndërroi jetë dy ditë më parë në Britani të Madhe si pasojë e koronavirusit. I riu nga Mollasi i Elbasanit jetonte në Angli prej disa vitesh.
Myzeqari kishte disa ditë me simptoma, por gjendja e tij u rëndua papritur dhe personat që kujdeseshin për të e dërguan në spital, por për fat të keq ai nuk ia doli.
Shokët dhe të afërmit filluan procedurat për kthimin e trupit të tij në atdhe, por patën të pamundur financiarisht. Tashmë në llogarinë e krijuar në gofundme janë mbledhur 30,696 paund nga 303 donatorë. Kujtojmë se Britania e Madhe është duke kaluar një valë tjetër të koronavirusit me mijëra të infektuar çdo ditë duke bërë që edhe numri i të vdekurve të rritet.
