Një rast i rëndë i dyshuar abuzimi dhe neglizhence ndaj fëmijëve ka tronditur shtetin e Ohios në SHBA, pasi autoritetet zbuluan 16 fëmijë që jetonin në kushte ekstreme brenda një banese në zonën rurale të Hamden.
Fëmijët, të moshave nga 18 muaj deri në 18 vjeç, u gjetën në një ambient të degraduar, ku sipas autoriteteve mungonin kushtet minimale të higjienës dhe sigurisë. Disa prej tyre dyshohet se nuk ishin në gjendje të flisnin, ndërsa më e madhja, një 18-vjeçare me probleme zhvillimore, nuk mund të shkruante as emrin e saj.
Zbulimi u bë gjatë ekzekutimit të një urdhri kontrolli për një hetim tjetër, të palidhur me fëmijët. Autoritetet kanë deklaruar se nuk prisnin të gjenin 16 fëmijë në atë banesë dhe se skena ishte ndër më të rëndat që kishin hasur.
Sipas hetuesve, fëmijët dyshohet se janë mbajtur për pjesën më të madhe të katër viteve të fundit në një hapësirë shumë të vogël, ndërsa nuk rezultonin të regjistruar në shkollë. Disa prej tyre janë dërguar në spital për kontroll dhe trajtim mjekësor.
Në lidhje me këtë rast janë arrestuar Gary Siders Sr., Christina Siders, Gary Siders Jr. dhe Elizabeth Siders. Ata akuzohen për rrezikim të fëmijëve, ndërsa në gjykatë janë deklaruar të pafajshëm. Secili prej tyre është lënë me garanci prej 300 mijë dollarësh.
Avokatët e të akuzuarve kanë kërkuar që çështja të ndjekë rrugën ligjore dhe që publiku të presë hetimet përpara se të nxjerrë përfundime përfundimtare.
Ndërkohë, autoritetet kanë marrë masa për mbrojtjen e fëmijëve, të cilët janë vendosur nën kujdesin e institucioneve përkatëse. Hetimet vijojnë për të përcaktuar përgjegjësitë dhe rrethanat e plota të ngjarjes.
Rasti ka shkaktuar tronditje të madhe në komunitetin lokal, ku banorët kanë deklaruar se nuk kishin dijeni për praninë e fëmijëve në atë shtëpi.
