Historia e shqiptarit Milto Dosi 45 vjec prej disa ditësh është në vëmendjen e mediave italiane në kufijtë e habisë mbi kërkesën e tij të pazakontë.
“Më mirë në burg se sa pa bukë për 3 fëmijët e mitur”, thotë Milto Dosi 45 vjec, i cili është dënuar më 2012 nga drejtësia italiane me 3 vite burg për trafik lëndësh narkotike.
Pas kryerjes së 2 viteve burgim më vitin 2014 vjen për të kërkesa e riatdhesimit për të vuajtur pjesën e mbetur të dënimit në Shqipëri, Por në dekretin e dëbimit të tij në atdhe ishte përfshirë dhe detyrimi i moshyrjes për 10 vite në territorin italian.
Në Shqipëri Milto Dosi nisi të punoj për të mbajtur familjen e tij me 3 fëmijë të mitur. Punësohet si kamionist në një shoqëri transporti por në çdo udhëtim pune jashtë kufirit shqiptar ai ndeshet me urdhërin e 10 vite dëbim larg territorit italian i cili përfshin të gjitha vendet e Shengenit.
“Jam përpjekur të punoj si kamionist në Shqipëri por kur udhëtoja në vendet si Gjermani, Austri, Francë etj në kontrollin kufitar më shfaqej urdhëri i dëbimit në Itali e më kthenin pas”, thotë Mitro Dosi.
Prej 2014 e deri më sot ai ka luftuar me situatën e vështirë ekonomike të familjes së tij në Shqipëri e rënduar dhe nga ky dekret dëbimi që nuk e lejon të punoj e të udhëtoj për punë në vendet e tjera të europës.
Për mediat italiane Milto Dosi rrëfen se pas konsultimit me avokaten e tij shqiptare vendosi të kërkoj që vitin mbetur të dënimit me burg ta kryej në Itali e pas kthimit në gjëndje të lirë t’i hiqet dhe urdhëri 10 vjecar i dëbimit nga territori italian . “Më mirë në burg se sa i papunë e pa bukë në Shëipëi”, shprehet ai.
Milto Dosi ka mbërritur pak ditë më parë me traget në Itali e në Policinë e Pesaros ka prezantuar kërkesën e tij për t’u rikthyer në burg. Deri në pritjen e një vendimi përfundimtar ndaj rastit të tij, Gjykata e Pesaros e kë vënë nën urdhërin e arrestit shtëpiak.
Avokatja e Milto Dosit deklaron gjithashtu se në rastin e tij është shkelur dhe neni i 19 i testit unik të emigracionit i cili ndalon dëbimin e largimin nga kufijtë për të afërmit deri në shkallë të dytë të qytetarëve italianë.
Milto Dosi ka në Itali një vëlla që është shtetas italian e pra nuk mund të dëbohet.
