Ethet e futbollit nuk mbarojnë kurrë, pavarësisht se Botërori mbylli siparin. Gazeta e njohur austriake, DerStandard ka publikuar një dossier, që tregon se kush e solli futbollin në Shqipëri.
Shkrimi ka për autor Krisztian Csaplar-Degovics, drejtues i sektorit për Europën Juglindore në Akademinë Hungareze të Shkencave.
Gjithçka nis kur Shqipëria shpall pavarësinë dhe austro-hungarezët ishin të shqetësuar për shkak të brishtësisë së shtetit të ri.
Shkodra ishte një nga rajonet më të rëndësishme në vend, por pas një rrethimi prej shtatë muajsh, ajo ra në duart e trupave serbe dhe malazeze më 24 prill 1913.
Situata humanitare në Shkodër ishte e vështirë dhe Fuqitë e Mëdha vendosën që të realizojnë një ndërhyrje të përbashkët ushtarake.
Trupat austro-hungareze, gjermane, italiane, britanike dhe franceze marshuan në fillim të majit në Shkodër.
Autori shkruan se administrimin e qytetit e morën përsipër tre admiralë të Fuqive të Mëdha.
“Me mbështetjen personale të kajzerit Franc Joseph në Shqipëri mbërritën disa ndihma, që u transportuan nga marina luftarake. Procesin e mbikëqyrte lejtnanti Ilija Zivkoviç, një oficer me origjinë serbe dhe shtetësi hungareze. Sipas disa të dhënave, ai ishte një oficer i aftë të fliste disa gjuhë të huaja dhe kishte marrëdhënie veçanërisht të mira me vartësit e tij”, shkruan autori.
“Pas operacionit të suksesshëm humanitar, togeri mbeti në Shkodër, pasi ishte përgjegjës i sigurisë për zonën ku ishin të vendosur austro-hungarezët. Ai nuk e pranonte situatën ku ndodhej rinia shqiptare. Për shkak se nuk kishte një sistem shkollor funksional, ai nisi të organizonte aktivitete sportive. Me miratimin e shtabit qendror, ai mblodhi të trinjtë nga mosha 14 deri në 20 vjeç dhe nisi t’u mësonte sportet moderne europiane. Mbi të gjitha, ai u mësoi rregullat e futbollit. Brenda pak ditësh, ai organizoi ekipet e para austra-hungarezo-shqiptare dhe nisën kështu ndeshjet e para të futbollit në Shqipëri”.
“Lajmi për ndeshjet e futbollit u përhap me shpejtësi në qytet. Oficerët britanikë ndiheshin të ofenduar se ideja për të mësuar futbollin tek të rinjtë shqiptarë nuk kishte ardhur prej tyre. Por ata e harruan shpejt këtë dhe nisën të formonin lojtarët e tyre. Francezët, italianët dhe gjermanët ndoqën shembullin e tyre. Kështu nisën miqësoret e para. Ekipet e asaj kohe simbolizonin fuqitë e mëdha të momentit dhe rivalitetin mes tyre. Për fat të keq, nuk ka informacion se cili ekip e fitoi kampionatin e parë në Shkodër”.
