Policia sapo ka përfunduar kontrollin e banesës së gazetares Adelajda Xhamani, 31 vjece e cila ndërroi jetë sot në banesën e saj pranë Thesarit të Shtetit, në zonën periferike të Freskut në Tiranë. Burime nga Komisariati Nr. 4 i Policisë së kryeqytetit, që e mbulon si territor atë zonë, thanë për Alpenews.al se kanë qenë punonjësit e tij që kanë realizuar edhe kontrollin. Kontrolli i banesës është një procedurë normale hetimore, që zhvillohet në raste vdekjes pa një shkak të jashtëm, sic rezulton deri tani nga këqyrja që i është bërë trupit të pajetë të gazetares.
Mjekët ligjorë janë ata që kanë tashmë në duar edhe pamjet e kufomës por edhe kampionët me material gjenetik, për të dalë në përfundime shkencore rreth shkakut zyrtar të largimit nga jeta të Xhamanit. Mediat fillimisht raportuan se vdekja ka ardhur si pasojë e një arresti kardiak, ndërkohë që më pas, ka qarkulluar një njoftim që i atribuohet policisë së shtetit, sipas të cilit shkaku i vdekjes është sëmundja e epilepsisë.
Burimi zyrtar i tha Alpenews.al se polia akoma NUK ka dalë në asnjë konkluzion për shkakun e vdekjes, pasi atë e përcaktojnë vetëm mjekët ligjorë, të cilët janë ende duke punuar për të dalë në një konkluzion final.
Ndërkohë që policia sapo ka përfunduar kontrollin e banesës së Adelajda Xhamanit, pasi kjo procedurë është e domosdoshme sipas saj, për të mësuar apo kërkuar të dhëna apo prova të tjera ndihmëse që mund të ndodheshin në banesë, të cilat ndihmojnë më pas, në daljen e konkluzioneve të sakta për shkaqet e vdekjes. Kjo procedurë kërkon domosdoshmërisht praninë e një familjari të viktimës, në momentin e kontrollit. Për këtë policia e Tiranës, ka qenë e detyruar që të kontaktojë në Kavajë, ku banon edhe familja e Adelajdës, me djalin e tezës së saj, i cili ka qenë i pranishëm gjatë kontrollit të policisë në banesë. Nuk ka të dhëna për gjetjen e ndonjë prove të dyshimtë, që mund të ketë ndikuar në rrethanat e vdekjes së papritur të gazetares.
Alpenews.al
