Autoritetet federale kanë nisur një hetim të gjerë penal për të zbuluar nëse dy oficerë të agjencisë së Imigracionit dhe Doganave (ICE) kanë dëshmuar rrejshëm nën betim. Rasti lidhet me një incident të armatosur të ndodhur muajin e kaluar në zonën Minneapolis-St. Paul, i cili përfundoi me plagosjen e një emigranti venezuelian.
Zhvillimi i ri vjen menjëherë pasi të gjitha akuzat penale kundër dy emigrantëve të përfshirë në ngjarje u rrëzuan papritur nga gjykata.
Provat me video rrëzojnë dëshmitë e oficerëve
Drejtori i ICE, Todd Lyons, konfirmoi të premten hapjen e një hetimi të përbashkët me Departamentin e Drejtësisë. Sipas tij, vendimi u mor pasi pamjet filmike të ngjarjes treguan mospërputhje thelbësore me versionin zyrtar të oficerëve.
“Dëshmia e betuar e dhënë nga dy oficerë të veçantë duket se përmban deklarata të rreme në lidhje me të shtënat me armë zjarri ndaj njërit prej burrave venezuelianë,” deklaroi Lyons.
Ai theksoi se gënjeshtra nën betim është një shkelje e rëndë federale dhe paralajmëroi se oficerët, emrat e të cilëve nuk janë bërë publikë, rrezikojnë shkarkimin dhe ndjekjen penale. Aktualisht ata janë pezulluar administrativisht.
Rrëzimi i akuzave dhe versioni i manipuluar
Më herët gjatë ditës, Gjykatësi i Qarkut të SHBA-së, Paul A. Magnuson, rrëzoi akuzat për “sulm të rëndë” kundër dy shtetasve venezuelianë, Alfredo Alejandro Aljorna dhe Julio Cesar Sosa-Celis.
Sipas padisë fillestare të qeverisë, më 14 janar, gjatë një tentative për t’i ndaluar në trafik, Aljorna pretendohet se u largua me vrap drejt banesës së tij. ICE pretendonte se gjatë ndjekjes, dy burrat kishin sulmuar oficerin me një lopatë bore dhe një dorezë fshese, duke e detyruar këtë të fundit të qëllonte për vetëmbrojtje, duke plagosur Sosa-Celis në kofshë.
Ky version u mbështet publikisht edhe nga Sekretarja e Sigurisë Kombëtare, Kristi Noem, e cila e quajti ngjarjen një “tentativë vrasjeje ndaj forcave të rendit”.
Megjithatë, Prokurori i SHBA-së për Distriktin e Minesotës, Daniel N. Rosen, kërkoi tërheqjen e akuzave, duke deklaruar se “provat e zbuluara rishtazi ishin në mënyrë materiale të papajtueshme me akuzat”.
Pamjet filmike dhe dëshmitë e tre dëshmitarëve okularë zbuluan një realitet tjetër: Sosa-Celis po tërhiqej brenda në shtëpi kur u qëllua, dhe nuk pati asnjë sulm fizik me mjete rrethanore.
Reagimi i mbrojtjes: “Gjuajtën përmes derës së mbyllur”
Avokati i imigracionit, Brian D. Clark, i cili përfaqëson dy venezuelianët, deklaroi se klientët e tij janë të gëzuar për vënien e drejtësisë, pasi rrezikonin vite të tëra burgim federal.
“Akuzat bazoheshin në gënjeshtra nga një agjent i ICE-së, i cili qëlloi në mënyrë të pamatur në shtëpinë e tyre përmes një dere të mbyllur,” tha Clark, i cili kërkoi publikimin e emrit të oficerit dhe ngritjen e akuzave ndaj tij.
Dyshime për fshehje të dëshmitarëve
Skandali thellohet edhe më tej me rastin e një venezueliani të tretë, Gabriel Alejandro Hernandez Ledezma, i cili jetonte në katin e poshtëm të së njëjtës ndërtesë. Ai u arrestua pa urdhër natën e ngjarjes dhe u dërgua me urgjencë në një qendër deportimi në Teksas.
Avokatët pretendojnë se ky largim i shpejtë u bë me qëllim për ta penguar atë të dëshmonte si dëshmitar okular, çka do të minonte versionin e ICE-së. Të hënën, një gjykatës federal urdhëroi rikthimin dhe lirimin e tij në Minesota.
Rasti ka ngritur pikëpyetje të forta mbi taktikat dhe transparencën e operacioneve të imigracionit nën drejtimin e administratës së re, ndërkohë që autoritetet shtetërore të Minesotës kanë hapur një hetim të tyre të pavarur për ngjarjen.
