Pasi vëlla e motër fituan gjyqin duke i hequr kështu emrin ‘Mehmet Shehu’ nga një rrugë në Ballsh, kamera e Report Tv shkoi tek kjo rrugë ku intervistoi edhe disa banorë. Ata shprehen se rruga është njohur gjithnjë si rruga ‘Mehmet Shehu’ ndërsa thonë se është emëruar në vitin 2003.
“Kjo rrugë ka qenë baltë. E ka pasur rruga Mehmet Shehu edhe e ka emrin sot. Tabela nuk është vendosur. Në vitin 2003 me këtë emër. E di që rrugës i është hequr emrin. Mehmet Shehu sa qe ishte figurë e lartë dhe e mbajti popullin siç dihej. Kushdo që do gabojë do të pësojë. Por ai qe shumë burrë i mirë. Demokracia i heq se është demokracia. Kapitalizmi dhe Socializmi kanë ndryshime.” tha një banorë.
Por sot tabela e kësaj rruge që fillon nga qendra e qytetit të Ballshit deri tek Uzina nuk ekziston më.
Dje Osman dhe Mirvjen Kaceli, fituan gjyqin për këtë emërim rruge, duke hequr emrin ‘Mehmet Shehu’. Ata janë fëmijët e Jonuz Kacelit, tregtarit nga Tirana, i cili ndërroi jetë në vitin 1951 nga torturat në hetuesi. Vendimi për emërtimin e rrugës ishte marrë në 29 maj të vitit 2002 nga Këshilli Bashkiak i Mallakastër, dhe pas një beteje ligjore për dëmshpërblim moral dhe për heqjen e emrit të Mehmet Shehut, vëlla e motër ia kanë dalë të fitojnë.
Me një vendim të 21 majit të vitit 2019, Gjykata Administrative e Shkallës së Parë në Vlorë ka vendosur të dëmshpërblejë me 300.000 lekë Osman dhe Mirvjen Kaceli, ndërsa pala e paditur ishte Këshilli dhe Bashkia e Mallakastrës.
