Kryeministri i Kosovës Ramush Haradinaj komenton incidentin e ditës së djeshme në ceremoninë e 140 vjetorit të Lidhjes Shqiptare të Prizrenit.
Kryeministri kosovar përzuri me forcë një grua nga foltorja. Ndërsa dje organizatori Jahja Lluka tha se gruaja në fjalë, mbesa e gjeneralit Mehmet Derralla, Valdete Derralla ka tentuar të ofendojë presidentin e Shqipërisë, Ilir Metën, ndërsa Haradinaj ka ndërhyrë duke e larguar nga mikrofoni.
Ndërkohë sot Haradinaj është shprehur për mediat kosovare se nuk është penduar aspak për veprimin që bëri.
“Ngjarja e djeshme është protokoll shtetëror. Në atë ngjarje e thërrasim veten edhe shtetet tjera. Është e papranueshme një i paftuar të flasë. Aty kenë dy zgjidhje: Ja policia, ja unë. Zot shpie kam qenë”, është shprehur Haradinaj.
Sipas kryeministrit, të qenit grua nuk e bën të falshëm veprimin e zonjës në fjalë. Ai thotë se do ta tërhiqte këdo që futet pa protokoll në ngjarje shtetërore.
“Sa të jem në detyrë kërkush s’më hyn nëpërkëmbë në ngjarje shtetërore. A ke burrë, a ke zojë, a ke fmijë”, tha ai, ndërsa më tej e krahason incidentin me arrestimin e Gjuriç në Kosovë.
“Ne kemi arrestuar Gjuriçin atje me tregu që jemi shtet, na e kemi ndalë Frashër Osekun para gruas e fëmijëve, e ne po e lejmë një grua aty me na torturu një popull, edhe me thanë i hijshëm i pahijshëm. Pahijshëm kom me e bo”, tha kryeministri.
Ndërsa shtoi në fund se nëse do ishte burrë gjërat do ishin ndryshe.
“Nëse ish kon burrë, e kisha kry edhe ma ndryshe. Aty ku qëlloj unë nuk shkelet shteti”.
