Hidrocentralet i Komanit dhe Vaut të Dejës ka hapur portat për të shkarkuar ujin pasi reshjet e shiut kanë mbushur basenet përtej nivelit të lejuar.
Intensiteti i shkarkimeve në HEC-in e Vaut të Dejës ka arritur në 600 m3/s ndërsa në atë të Komanit 500 m3/s. Të dy hidrocentralet po punojnë me kapacitet të plotë, ndërsa KESH ka vënë në punë të gjithë agregatët duke rritur prodhimin e energjisë.
Vetëm gjatë 24 orëve të fundit niveli i ujit në hidrocentralin e Fierzës është rritur me 2 metra, duke arritur në kuotat 270 metra, ndërsa prurjet kanë arritur në 1700 m3/s.
Reshjet e shumta kanë bërë që KESH të hapë një tjetër tender për të shitur energji edhe për 4 ditët e para të dhjetorit, ndërsa burime zyrtare thonë se është planifikuar që në ditët e ardhshme të shitet ende një sasi energjie elektrike.
