Çudirat në politikën shqiptare nuk kanë të sosur. E dhimbshme është kur ato vijnë pikërisht nga andej nga ku edhe pritet më pak, nga forcat kryesore politike në vend.
Për të dytën ditë me radhë, dy emra të njohur nga Partia Demokratike, Kryetari i Grupit Parlamentar Edmond Spaho dhe anëtarja e Kryesisë së kësaj partie Grida Duma, kanë bërë deklarata refuzimi ndaj një oferte as të ofruar e as të kërkuar nga ana e Partisë Socialiste.
Gjatë një interviste në media, e para ishte znj. Duma ajo që deklaron se: “Duhet të jemi të qartë në atë që bëjmë, që nuk do ketë bashkëqeverisje me Ramën dhe se në pushtet do vijmë nga zgjedhje të drejta.”
Zërat për bashkqeverisje me Ramën gjithmonë kanë ardhur në formën e dëshirave mohuese nga gardhi brenda opozitës, ndërkohë që PS në të gjitha votimet e fundit ka patur të paktën 77 vota në Parlament. Çka do të thotë se ajo jo vetëm që nuk e ka nevojën e numrave të tjerë kur për të qëndruar në pushtet i duhen të paktën 71 deputetë, por mbi të gjitha, asnjë zë nga mazhoranca nuk e ka lënë, qoftë edhe të kuptohet këtë gjë.
E si të mos mjaftonte kjo, ka qenë Edmond Spaho ai që shkon edhe përtej fantazisë së Dumës, kur thotë se “do të duhet një qeveri tranzitore e përgjegjshme, qoftë edhe e dalë nga Partia Socialiste, por me njerëz të cilët kanë integritet dhe janë të përkushtuar apo të përgjegjshëm ndaj zhvillimeve në vend.”
Ironia në këtë rast është se ka qenë vetë Partia Demokratike ajo që në Kuvendin Kombëtar të mbajtur para rreth një jave e ka paraqitur opsionin e një qeverie tranzitore, si një synim të saj politik. E pa kaluar as disa ditë, këtë dëshirë, nisin dhe e besojnë po vetë duke e trajtuar si një realitet që po shkon drejt faktit të kryer. Madje, duke shkuar deri atje sa si për ironi të realitetit vetë, po e bëjnë edhe të qartë publikisht, se pas kësaj as që nuk do të denjojnë që ti bashkëqeverisin shqiptarët me Edi Ramën!
Habi e madhe. Aq më tepër që kanë përpara edhe protestën e 16 shkurtit, e në këtë mënyrë në vend që ti motivojnë, mund ti dekurajojnë edhe më shumë demokratët e që “u dhimbsen aq shumë”!
Alpenews.al
