Dy shtetas grekë dhe një shqiptar janë arrestuar të enjten kur po transportinin një sasi të madhe kanabisi, që ishte futur në vend nëpërmjet kufirit me Shqipërinë.
Sipas policisë, ata janë pjesëtarë të një rrjeti kriminal që sillte drogë nga Shqipëria dhe trafikonte në Greqi.
Policia ndaloi dy makina që po lëviznin në aksin rrugor drejt Athinës, në vendin e quajtur Kompoti pranë pranë qytetit të Artës.
Makina e dytë, që drejtohej nga një shtetas grek me moshë 44 vjeç, ishte e ngarkuar me kanabis. Policia sekuestroi 81 paketa që peshonin 162,9 kliogramë.
Makina e parë, që shërbente si pararojë, drejtohej nga një tjetër shtetas grek, gjithashtu 44 vjeç, dhe kishte për bashkudhëtar një shqiptar me moshë 32 vjeç. Ky i fundit kishte dokumenta homogjeni, që kanë shumë qytetarë shqiptarë me kombësi greke.
Siç rezultoi nga hetimet, automjeti i ngarkuar me drogë ishte në pronësi të një shtetaseje greke, e cila po kërkohet.
