Fondi Monetar Ndërkombëtar pritet të këmbëngulë për Greqinë që të zvogëlojë zbritjen e taksave përpara janarit 2019, pasi të enjten zëdhënësi i FMN-së Gerry Rice nuk përjashtoi mundësinë që Fondi mund të kërkonte uljen e pragut të taksave sa më parë.
Plani aktual për zvogëlimin e zbritjes së taksave është që ai të zbatohet nga viti 2020, por FMN ka gjithnjë e më shumë gjasa të kërkojë që masa të futet një vit më parë me arsyetimin se, ndryshe, suficiti primar buxhetor prej 3.5 për qind i PBB-së nuk do të arrihet. Kjo do të thoshte një goditje e dyfishtë për grekët nga janari i ardhshëm, kur pensionet gjithashtu do të ulen.
“Diskutimi me evropianët dhe grekët mbi shifrat fiskale të 2019 do të zhvillohet në muajt e ardhshëm, siç parashikon afati i dakorduar”, tha Rajs, duke treguar për marrëveshjen e ndihmës që dikton vendimin që të bëhet në maj, shkruan ekathimerini.
Në javët e fundit burimet evropiane kanë thënë se FMN po këmbëngul në pozitën e saj për uljen e njëkohshme të pragut të taksave dhe pensioneve në vitin 2019, nëse objektivi i suficitit primar duhet të plotësohet.
Komisioni Evropian e ka bërë të qartë se nuk pajtohet me këtë vlerësim dhe Komisioneri i Çështjeve Ekonomike Pierre Moscovici shprehu shpresën se Fondi do të sjellë vlerësimet e tij në një nivel më real./monitor/
