Fondi për Zhvillimin e Rajoneve shpall thirrjen e parë për aplikim dhe për financim të projekteve për arsimin. Për 2019-ën, Fond ka vënë në dispozicion të bashkive një grant prej rreth 700 milionë lekësh të cilat pritet të përdorën nga njësitë e qeverisjes vendore për të realizuar projektet për rehabilitimin e objekteve arsimore ekzistuese në arsimin parauniversitar, ndërtimin e objekteve të reja arsimore si edhe për rehabilitimin dhe zgjerimin e kapaciteteve të objekteve arsimore, përfshirë arsimin bazë dhe atë të mesëm.
Ndërkohë që në Fletoren Zyrtare nënvizohet se fondi i vënë në dispozicion për arsimin bazë është gjithsej 341. 9 milionë lekë dhe ai për arsimin e mesëm 330.3 milionë lekë ndërsa vlerësimi i projekteve pas aplikimit nga ana e bashkive të interesuara do të bëhet nga sekretariati teknik, në Ministrinë e Arsimit, Sportit dhe Rinisë, sipas kritereve. Në vendim nënvizohet dhe vlera e bashkëfinancimit të projekteve e cila varet nga numri i banorëve të njësive vendore.
Për ato me popullsi mbi 100 000 banorë, vlera dysheme e bashkëfinancimit nga ana e njësisë së qeverisjes vendore, të jetë në masën 50% të vlerës së plotë të projektit, ndërsa për ato me popullsi nën 50 000 banorë, vlera dysheme e bashkëfinancimit nga ana e njësisë së qeverisjes vendore të jetë në masën 10% të vlerës së plotë të projektit.
