Ragip Hajdini, i arrestuari i gjashtë për grabitjen në Rinas, është lënë në burg ditën e sotme. Në seancën gjyqësore, shtetasi kosovar u shpreh se nuk ka asnjë lidhje me ngjarjen dhe ka mësuar rreth kësaj nëpërmjet mediave. Më tej Hajdini ka kërkuar ballafaqim me Bengasin, që e ka implikuar në këtë histori. “Kam njohje me familjen Murataj. Njoh vëllain e Admirit, Aleksandrin. Kam qenë edhe në varrimin e Admir Muratajt në Tropojë. Për asnjë moment nuk kam pasur për qëllim të largohem nga Shqipëria.
Kam dëgjuar nga media për një person nga Kosova me nofkën “Daja”, ashtu si më quajnë edhe mua. Ditën e ngjarjes kam qenë duke drekuar me disa miq në rrugën dytësore Tiranë-Kavajë, mund t’ja u konfirmoj këtë me video edhe foto. Kërkoj të ballafaqohem me bashkëpuntorin e drejtësisë, Anton Bengasin, i cili më ka përfshirë në këtë histori. Kërkoj që të hetoni për të, si një person që ka një rrogë 500 mijë lek dhe ka një shtëpi luksoze në zonën e Liqenit të Thatë. Gjykata e Krimeve të Rënda ka vendosur masën e sigurisë “Arrest në burg”. Hajdini u arrestua më 26 prill në zonën e Shkëmbit të Kavajës, si një nga të dyshuarit për grabitjen e 9 Prillit në Rinas.
