Një karafil qëndronte këtë të shtunë para pikës së këmbimit valutor në Fier ku Agur Vrenozi mori një plumb që i kushtoi jetën, teksa tentoi të parandalojë një grabitje të armatosur.
Grabitja, e fundit e një serie ngjarjes të rënda, ka ngjallur reagime të forta deri në thirrje për rikthimin e dënimit me vdekje.
“Dënim me vdekje! E ka hequr Komiteti Europian etj etj por do dënim me vdekje, pikë”.
Kërkesa për masën ekstreme, lidhet nga qytetarët edhe me mosbesimin tek drejtësia shqiptare, që siç thonë, i liron autorët e ngjarjeve të rënda pa mbajtur përgjegjësi.
” I fusin këtej dhe i nxjerrin në anën tjetër”.
“Mendoj që shteti duhet të ketë ligje më të ashpra për hajdutët”.
53 vjeçari i cilësuar “një hero”, mbeti i plagosur rëndë, ndërsa u përlesh me dy persona të armatosur që vodhën këtë pikë këmbimi valutor (në foto) dhe dhunuan pronarin e saj, Gëzim Hoxha.
Shembull i njeriut që donte që Fieri e Shqipëria të mos jetë kjo që është, e cilësoi Ministri i Mjedisit Blendi Klosi 53 vjeçarin, që ishte punonjës i Drejtorise se Pyjeve dhe Mjedisit ne Fier.
Klosi: Shembull i një njeriu të përgjegjshëm dhe i një njeriu i cili donte që Fieri dhe Shqipëria të mos ishte kjo që është.
Agur Vrenozi ndërroi jetë në spitalin e Traumës, dhe u përcoll këtë të shtunë për në banesën e fundit në Fier, mes dhimbjes së familjarëve dhe qytetarëve të shumtë.
Për ngjarjen u arrestuan Zini Fyraj, 37 vjeç nga Sevaster i Vlorës, Lulëzim Demiraj, banues në Vajzë Vlorë dhe Dashamir Gergali, 41 vjeç, banues në Zhupan, Fier.
