Policia ka rënë në gjurmët e autorëve të vrasjes gjatë tentativës së grabitjes së një minimarketi në Kamëz, por në periferi ata kanë humbur gjurmët. Nga ngjarja humbi jetën pronari i marketit, 52-vjeçari Agim Buci, ndërsa bashkëshortja e tij, Merita Buçi mbeti e plagosur. Kjo e fundit ka tentuar të godasë me thikë një nga autorët, madje dyshohet se e ka lënë atë të plagosur.
Burime pranë policisë thanë për Report Tv se menjëherë pas ngjarjes, policia ka konstatuar një automjet me ngjyrë të zezë i cili lëvizte më shpejtësi.
Makina dyshohet se iu përket autorëve të krimit. Edhe pse policia i ka ndjekur për disa minuta, ata kanë mundur të arratisen.
Ekspertët e kriminalistikës kanë gjetur gjurmë gishtash në vendin e ngjarjes që dyshohet se janë të autorëve. Kjo mund të çojë në identifikimin e shpejtë të grabitësve.
Gjithashtu në minimarket pranë banesës së familjes Buçi ka dhe kamera sigurie e cila ka filmuar autorët. Te thika e gjetur ka gjurmë gishtash, prova të cilat mund të ndihmojnë në identifikimin e autorëve të krimit.
Të shtënat me armë zjarri dhe britmat e Merita Buçit janë dëgjuar në zonë nga fqinjët të cilët të alarmuar kanë mbërritur menjëherë te minimarketi si dhe kanë njoftuar policinë. Zona ku ka ndodhur ngjarja është në errësirë dhe nuk ka shumë lëvizje.
