Zëvendësministri i Brendshëm, Besfort Lamallari, gjatë një interviste për Agjencinë Telegrafike Shqiptare, bëri të ditur se ligji i miratuar nga qeveria ka në fokus ekonominë e paligjshme, duke mbrojtur atë të ligjshmen.
“Shënjestrimi, sekuestrimi dhe konfiskimi i pasurive dhe aseteve të krimit të organizuar cënon drejtpërdrejtë pushtetin financiar të grupeve dhe eksponentëve të krimit të organizuar. Filozofia ” Ndiq paranë” ka rezultuar një praktikë e suksesshme e shumë vendeve të zhvilluara, në përballje me rrjetet e sofistikuara kriminale”,- tha Lamallari.
“Dobësimi i pushtetit financiar të grupeve kriminale vlerësohet si goditje në thembrën e Akilit për krimin e organizuar. Shkatërrimi i potencialit ekonomik dhe përpjekjeve për pastrimin e të ardhurave kriminale mbron ekonominë e ligjshme, konkurencën dhe sipërmarrje ekonomike të ndërtuar dhe që funksionon mbi rregullat e tregut. Si i tillë akti përbën një garanci shtesë për parandalimin e injektimit të të ardhurave me origjinë kriminale në ekonominë e vendit”,- shtoi Lamallari.
“Akti normativ sulmon dhe dobëson potencialin korruptues dhe infiltrues të krimit të organizuar. Prandaj kjo qasje përbën një mekanizëm të fortë për ruajtjen dhe garantimin e integritetit të agjencive ligjzbatuese dhe organeve të drejtësisë, kryesisht atyre penale. Ndikimi social i aktit normativ konsiston në heqjen dhe dobësimin e çdo motivi apo iluzioni për pasurim të shpejtë dhe të paligjshëm. Askush,-tha Lamallari,- nuk do të ishte i gatshëm të rrezikojë përfshirjen në veprimtari të paligjshme fitimprurëse dhe dënimin penal, duke ditur fatin e paracaktuar të sekuestrimit dhe konfiskimit të të ardhurave të përftuara kriminale. Në këtë mënyrë ai mbron të rinjtë dhe grupet vulnerabël të shoqërisë ndaj ekspozimit, joshjes dhe rekrutimit nga krimi i organizuar”-, tha Lamallari më tej.
Duke folur për bilancin e punës së bërë nga Operacioni Forca e Ligjit, Lamallari nënvizoi se deri më tani janë mbi 41 subjekte që u janë dërguar formularët e pasurisë. Sipas tij, deri tani janë sekuestruar rreth 71 automjete.
“Ditën e premte lajmi që u transmetua flet për një vendim të Gjykatës së SPAK që konfirmon kërkesën e strukturës OFL për të sekuestruar pasuri të tilla kriminale për subjekte që janë pjesë e këtij ati normativ”,- vijoi ai.
“Ka patur që në fillim të punës së OFL janë qindra praktika të mbledhura nga drejtoritë vendore të policisë të përcjella në OFL dhe më pas duke vijuar edhe me hetimet që ata kryejnë dhe më pas përcillet formulari për vetëdeklarimin e pasurive që më pas plotësohet me dokumente shtesë dhe përcillet në prokurori. Janë mbi 40 shtetas që kanë marrë formular. Shumë prej tyre kanë plotësuar formularin sipas afatit kohor dhe janë përcjellë edhe në Prokurorinë e Posaçme. Kemi parë shumë pasuri të sekuestruara. Janë rreth 71 automjete, pasuri tokë truall, edhe komplekse”-, tha zëvendës ministri Lamallari.
“Janë diku mbi 85 praktika të përcjella nga OFL tek SPAK. Mesatarisht çdo ditë ka 2-3 kërkesa që përcillen, shpërndahen ndaj subjekteve të aktit normativ. Më pas vijohet me hetimin e pasurisë së tyre, dokumentohet çdo provë e mundshme dhe një punë e mirëkoordinuar me SPAK kanë sjellë këto vendimet e para, pra kërkesat për sekuestro”,- bëri të ditur Lamallari, për Agjencinë Telegrafike Shqiptare.
