Të gjithë prokurorët dhe gjyqtarët që janë skualifikuar apo që janë dorëhequr nga procesi i Vetting-ut nuk do të lejohen që të punojnë si avokatë. Kjo u konfirmua nga vetë kreu i kësaj dhome, Maks Haxhia gjatë shqyrtimit të projektligjit të ri të avokatisë në Komisionin e Ligjeve.
“Lind pyetja, këta që digjen nga Vettingu, a do të bëhen avokatë? Se ata juristë janë. Jo, ne kemi vënë pengesë. Nuk duam ta kthejmë avokatinë në strehën e të korruptuarve, apo të të larguarve nga Vettingu”, tha Maks Haxhia Kreu i Dhomës Kombëtare të Avokatisë
Kjo u mbështet dhe u përshëndet edhe nga deputetë socialistë dhe kreu i Komisionit të Ligjeve. “Tu qëndrojmë fort këtyre neneve bllokuese”, Bashkim Fino, deputet i PS. “Nuk mund të fusim nga penxherja ata që largojmë nga vettingu. Nuk mund t’i pastrojmë në një anë dhe nga ana tjetër t’i sjellim sërisht në sallën e gjyqit”, Ulsi Manja, kreu i komisionit të Ligjeve
Ministrja e Drejtësisë tha se ligji i ri duhet t’u japë fund avokatëve të korruptuar. “Duhet t’u japim fund avokatëve që zvarrisin gjyqet, dhe atyre që janë të korruptuar””, tha Etilda Gjoni Ministre e Drejtësisë. Ministrja kërkoi që Komisioni i Ligjeve, përmes ligjit të ri të japë më shumë kontroll shtetëror mbi Dhomën e Avokatisë.
