Ish-administratori i Digitalb, Alban Jaho, është paditur nga kompania ku ai punoi prej 15 vitesh, për akuzën e shpërdorimit të detyrës.
Jaho është paditur për përvetësimin e 430 milionë lekëve, ndërkohë gjykata ka vendosur pezullimin e 3% të aksioneve që ai kishte në këtë kompani.
Ndërkohë që procesi gjyqësor është i hapur, Jaho është përfaqësuar në seancë avokatin, Neshat Fana. Bashkëshortja e këtij të fundit, Mirela Fana, dha dorëheqjen si gjyqtare e Gjykatës së Lartë për t’i shpëtuar Vetting-ut.
Të dy, burrë e grua, kanë krijuar një pasuri qindra milionëshe dhe mosjustifikimi i saj, detyroi Mirela Fanën që të mos përballej me Vetting-un, shkruan gazeta shqip.
Fana nuk është një emër i panjohur pasi ai ka përfaqësuar familjen e ish-kryeministrit Berisha, pothuajse në të gjitha proceset gjyqësore ku kanë qenë të përfshirë.
Në kohën kur në pushtet ishte Partia Demokratike, Sali Berisha, në atë kohë kryeministër, ka emëruar Fanën, fillimisht në Këshillin e Lartë të Drejtësisë dhe më pas në krye të Shkollës së Magjistraturës.
Berisha dhe Alban Jaho, që sot janë bërë bashkë edhe me TV Klan, dikur sulmonin njëri-tjetrin në mënyrën më të ashpër.
Po të rikthehemi pas në kohë, në 16 kusht të vitit 2018, Berisha akuzonte Jahon se kishte manipuluar komisioneren e Vetting-ut, Valbona Sanxhaktarin. Sipas ish-kryeministrit, kjo e fundit përdorte pikërisht makinën e Jahos për të shkuar me pushime jashtë Shqipërisë.
Ndërkohë që pas një viti, gjërat kanë ndryshuar si me një të rënë të lapsit. Tashmë Berisha e cilëson Jahon si një drejtues mjaft të talentuar dhe shprehet se shkarkimi i tij ishte i padrejtë. Për më tepër ish-kryeministri vendos edhe avokatin e tij në dispozicion të njeriut që dikur e sulmonte ashpër.
Muajt e fundit, në krah të Jahos është shfaqur edhe Aleksandër Frangaj, ku jo me pak ironi thuhet se Jaho po kontrollon totalisht TV Klan.
