Tre punonjës të Inspektoratit Shtetëror Shëndetësor në Elbasan janë proceduar penalisht për gjobitje fiktive për duhanpirje në ambiente ku nuk lejohet, çka është kundërshtuar nga vetë ky institucion.
“Ne date 11.11.2019 Subjekti fizik bar- kafe eshte konstatuar ne shkelje te ligjit antiduhan nga trupa inspektuese Esida Mile dhe Ardian Muca me detyre inspektor prane Inspektoratit Shteteror Shendetesor Dega Rajonale Elbasan dhe Kryeinspektori i Qarkut ISHSH Elbasan Hektor Musaraj.
Sipas procedurave ligjore subjekti eshte gjobitur me vlere 300 000 mije leke(te reja) per duhanpirje dhe prezenc te tavllave ne ambiente te mbyllura. Inspektimi eshte kryer konform ligjit dhe shkelja eshte dokumentuar me foto“, thuhet në njoftimin për shtyp të ISHSH-se.
Çka e komplikon më tej këtë histori është dhe një tjetër fakt që ky institucion pretendon, goditja e kryeinspektorit dhe njërit prej inspektorëve për shkak të detyrës nga pronari i lokalit, një emër i njohur për drejtësinë shqiptare, Elton Kila.
“Ne date 21.11.2019 rreth ores 10 e 30 subjekti paraqitet ne zyre te kryeinspektorit dhe me tone presioni qe ti hiqet gjoba godet fillimisht kryeinspektorin dhe me pas inspektorin dhe largohet nga zyra.Inspektori A.M dergohet ne urgjenc ku merr ndihmen e pare dhe Kryeinspektori paraqitet prane Policise Vendore Elbasan per te denoncuar rastin. Policia ka arrestuar ne flagrancë shtetasin Elton Kila me akuzen goditje per shkak te detyres.”, vijon njoftimi për shtyp i ISHSH.
Ajo çfarë nuk sqarohet në të gjithë këtë histori është pyetja: Pse u proceduan në gjendje të lirë 3 punonjësit e ISHSH me argumentimin ‘gjobitje fiktive’ të subjektit, teksa ata paskan zbatuar ligjin?
Sipas gjobës të hedhur online nga grupi inspektues së bashku janë bashkëngjitur dhe fotot e lokalit të kapur në shkelje në momentin e inspektimit, rreth orës 14:45 duke rrëzuar çdo pretendim për gjobitje fiktive.